پارێزگاری دهۆک: زۆرترین ڕێژەی تووشبووانی شێرپەنجە لە دهۆک نییە

ئاڤا نیوز

پارێزگاری دهۆک ڕەتیدەکاتەوە دهۆک لە پلەی یەکەمدا بێت بۆ تووشبوون شێرپەنجە، دەشڵێت "زۆرترین ڕێژەی لە پارێزگاکەمان نییە".

لێدوانی فەرمی: عەلی تەتەر، پارێزگاری دهۆک بە ئاڤا نیوزی گوت: ڕێژەی تووشبوونی خەڵکی پارێزگاکەمان بە شێرپەنجە نەگەیشتووەتە ڕێژەی ستانداردی جیهانی، ئەو دەنگۆیانەی دەڵێن، زۆرترین ڕێژەی تووشبووان لەسەر ئاستی هەرێمی کوردستان لە دهۆکە، ڕاست نییە.

زانیاریی زیاتر: لە ماوەکانی ڕابردوودا، سەرۆکوەزیران بارزانی سەردانی دهۆکی کرد و بەردی بناغەی بۆ نەخۆشخانەیەکی شێرپەنجە دانا، جگە لەوەش کار لە نەخۆشخانەی کۆنی فریاکەوتنی شارەکە دەکرێت بە مەبەستی نۆژەنکردنەوە و تەرخانکردن بۆ چارەسەرکردنی تووشبووانی شێرپەنجە.

ژمارەکان وا دەڵێن: لە هەرێمی کوردستان لە ساڵی 2012وە تاوەکو ساڵی 2023، 81 هەزار و 62 نەخۆش تۆمارکراون، بەپێی ئامارەکانی وەزارەتی تەندروستیش ڕێژەی تووشبووانی شێرپەنجە لە ساڵی 2023ـدا لە دهۆک هەزار و 180 کەس بووە.