هاوشێوەی تەیف سامی، ئاواتی شێخ جەناب بەشداریی کۆبوونەوەکەی بەغدای نەکرد

ئاڤا نیوز

 

هاوشێوەی تەیف سامی، وەزیری دارایی عێراق، ئاوات شێخ جەناب، وەزیری دارایی هەرێمی كوردستانیش ئامادەی كۆبوونەوەی ئەمڕۆی نێوان شاندی هەرێمی كوردستان و وەزارەتی دارایی عێراق نەبوو.

 

چیرۆكی سەرەكی: ئێوارەی پێنجشەممە 30-1-2025، شاندێكی باڵای حكومەتی هەرێمی كوردستان بۆ یەكلایی كردنەوەی پرسی مووچە و گفتوگۆ لەگەڵ بەرپرسانی باڵای عێراق بە سەردانێک گەیشتنە شاری بەغدا، دوێنێ هەینی لە هۆتێل بەغدا كۆبوونەوەیەكی دوو كاتژمێری كرا و ئەمڕۆش لە كاتژمێر (8:00)ەوە كۆبوونەوەی دووەم دەستی پێكردووە و چاوەڕوان دەكرێت تاوەكو پاشنیوەڕۆ بخایەنێت.

 

زانیاریی پەیامنێر: دەروون مەلا ناجی، پەیامنێری ئاڤا میدیا لە بەغدا ڕایگەیاند: تەیف سامی، وەزیری دارایی عێراق دوێنێ ڕایگەیاند كە گەشتی نەجەف دەكات و ئەمڕۆ لە كۆبوونەوەكە ئامادە نابێت، بەڵام لە دەستپێكی كۆبوونەوەكەی ئەمڕۆ لەگەڵ شاندی هەرێمی كوردستان و عێراق بۆ ماوەیەكی كورت كۆبووەتەوە و پاشان ڕۆیشتووە و بەشداریی لە كۆبوونەوە هاوبەشەكەی نەكردووە.

 

زانیاریی زیاتر:  بەشداربووان بریتی بوون لە تیمی تەكنیكیی هەردوولا، هاوكات ئاوات شێخ جەناب، وەزیری دارایی حكومەتی هەرێمی كوردستانیش بە هۆی بەشدارینەكردنی تەیف سامی، بەشداریی لە كۆبوونەوە هاوبەشەكە نەكردووە.

 

ئەوەی پێویستە بیزانیت: دوێنێ ئاوات شێخ جەناب، وەزیری دارایی و ئابووریی حكومەتی هەرێمی كوردستان دوای كۆبوونەوەكەی شاندی هەرێمی كوردستان و عێراق لە هۆتێل بەغدا ڕایگەیاند: کۆبوونەوەکە لە کەشێکی زۆر ئەرێنی بوو، هەردوولا وەک یەک تیم کاریان کردووە، هیوادارین شەممە كۆبوونەوەكان تەواو بن و بۆ یەکشەممە مووچە تەمویل بکرێت.