72 قوتابخانە لە ڕێگەی وزەی خۆر کارەبای 24 کاتژمێرییان بۆ دابین دەکرێت

ئاڤا نیوز

بڕیارە لە ساڵی داهاتوو 72 قوتابخانەی دیکە کارەبای 24 کاتژمێرییان بۆ دابین بکرێت، لە دیزاینی دروست کردنی قوتابخانە نوێیەکانیش ڕەچاوی دانانی سیستمی سۆلاریان بۆ کراوە.

 

بۆچی گرنگە: بەرهەمهێنانی کارەبا لە ڕێگەی وزەی خۆر دۆستی ژینگەیە و لە هەرێمی کوردستانیش سەرکەوتوو بووە، بۆیە وەزارەتی پەروەردە کار بۆ ئەوە دەکات لە پەسەندکردنی نەخشە و دیزاینی نوێی درووست کردنی قوتابخانەی تازە سیستمی سۆلاریان بۆ دابمەزرێنێت.

 

وێنە گەورەکە: لە هەرێمی کوردستان لە ڕێگەی وزەی خۆر 81 قوتابخانە کارەبای 24 کاتژمێرییان بۆ دابین کراوە، بڕیاریشە 72 قوتابخانەی دیکە لەڕێگەی دانانی سۆلەر پانێڵ ببنە خاوەنی کارەبای 24 کاتژمێری. وەزارەتە کارەبای هەرێمی کوردستانیش بۆ ئەو مەبەستە دیزاین و دەرخستە بۆ فەرمانگەکان دەکات، هاوکات لە دیزاینی نەخشەی نوێی قوتابخانەکان ڕەچاوی دیزاینی دانانی سیستمی سۆلەر دەکرێت.