نەتەوە یەكگرتووەكان 263 ڕاسپاردەی پەیوەست بە مافی مرۆڤ ئاڕاستەی عێراق و كوردستان دەكات

 

ئاڤا نیوز

لە بارەگای نەتەوە یەكگرتووەكان لە جنێڤ، بە بەشداریی نوێنەری حکومەتی هەرێمى كوردستان، ڕاسپاردەکانی عێراق بۆ پانۆرامای خولی گشتگیری ئەنجوومەنی مافەكانی مرۆڤ، پەسەند كران.

چیرۆکی سەرەکی: لە بارەگای نەتەوە یەکگرتووەکان لە جنێڤ خولی 48ـەمینی پانۆرامای  گشتگیری ئەنجومەنی مافەکانی مرۆڤ (UPR) بەڕێوەچوو، شاندێكی عێراقیش بە سەرۆكایەتی خالید شوانی، وەزیری دادی حكومەتی فیدڕاڵی و عەبدولكەریم هاشم، نوێنەری هەمیشەیی عێراق لە جنێڤ، بەشداربوون و دكتۆر دیندار زێباریش، ڕێكخەری ڕاسپاردە نێودەوڵەتییەكان وەك نوێنەری حكومەتی هەرێمی كوردستان بەشداربوو.

ڕاگەیێنراوی فەرمی: ماڵپەڕی فەرمیی حكومەتی هەرێمی كوردستان بڵاویكردووەتەوە، لە كۆبوونەوەكانی ڕۆژانی بەڕێوەچوونی پانۆرامای خولی گشتگیری ئەنجومەنی مافەكانی مرۆڤ (UPR)، ژمارەیەك ڕاسپاردە ئاراستەی شاندی عێراق کراون كە پەیوەست بوون بە ڕەوشی مافی مرۆڤ لە عێراق و هەرێمی كوردستان، هاوكات پێداچوونەوەش بە ڕاپۆرتی ئەو ڕاسپاردانە كرا كە لەلایەن شاندی عێراق و هەرێمی كوردستان لە كۆبوونەوەكان خرابوونەڕوو.

ئەوەی پێویستە بیزانیت: لە ڕۆژی 2025-01-27، نوێنەرانی وڵاتان ڕاسپاردە و سەرنجەکانی خۆیان پێشکەش بە شاندی حکومەتی فیدراڵ و هەرێمی كوردستان کرد، لە چەند ڕۆژی ڕابردوودا بە بەشداریی حکومەتی هەرێم کۆبوونەوەکانی لیژنەی ترۆیکا و پسپۆڕانی ئەنجومەنی مافەکانی مرۆڤ بەردەوام بوون بۆ ڕێکخستنی ئەو ڕاسپاردانەی لەلایەن نوێنەرانی وڵاتانەوە ئاراستەی عێراق کراون و دووبارە داڕشتنەوە و یەکخستنیان.

چی ڕوویدا: لە خولی (48)ـەمینی پانۆرامای خولی گشتگیر، 263 ڕاسپاردە لە بوارە جیا جیاکان ئاراستەی عێراق کراون، کە پێویستە لە ماوەی داهاتوودا هەڵوێستی خۆی بە قبوڵکردن یان ڕەتکردنەوەیان بە ئەنجوومەنی مافەکانی مرۆڤ ڕابگەیەنێت، بۆ ئەوەی لە خولی (49)ـی پانۆرامای خولی گشتگیر کار بۆ جێبەجێکردنیان بکرێت.