وڵاتانی عەرەبی پێشنیازی ترەمپ بۆ وەرگرتنی ئاوارە فەڵەستینییەکان ڕەتدەکەنەوە

 

ئاڤا نیوز

دۆناڵد ترەمپ، سەرۆکی ئەمریکا دوپاتی دەکاتەوە کە هەر یەکە لە میسر و ئوردن ئاوارەکانی غەززە وەردەگرن، لە بەرامبەردا وڵاتانی میسر و ئوردن ڕەتیانکردەوە.

چیرۆکی سەرەکی: ئەم لێدوانەی ترەمپ لە کاتێکدایە کە هەر یەکە لە عەبدولفەتاح سیسی، سەرۆکی میسر و شا عەبدوڵڵای دووەم، شای ئوردن، پلانی گواستنەوەی ئاوارەکانی غەززەیان لە فەڵەستینەوە بۆ وڵاتەکانیان ڕەتکردووەتەوە.

بۆچوونی لایەنی بەرامبەر: سەبارەت بە هەڵوێستی ئەمریکا لە بەرامبەر ئەم ڕەتکردنەوەیەی میسر و ئوردن، ترەمپ بە میدیاکارانی گوتووە "ئەوان ئاوارەکانی غەززە وەردەگرن و ئەو کارە دەکەن. ئێمە کاری زۆرمان بۆ ئەوان کردووە، ئەوانیش ئەو کارە دەکەن."

لەلایەکی دیکەوە: لە دوای کۆبوونەوەی پێنج وڵاتی عەرەبی و بە ئامادەبوونی ئەمینداری گشتیی کۆمکاری عەرەبی و لایەنی فەڵەستینی، لە ڕاگەیێنراوێکدا هەریەک لە وڵاتانی میسر و ئوردن و ئیمارات و سعودیە و قەتەر، هەر هەنگاوێکیان بۆ ئاوارەکردن یان هاندانی فەڵەستینەکان بۆ ئاوارەکردنیان بۆ وڵاتەکانیان بە هەر شێوەیەک و لە هەر بارودۆخ و پاساوێکدا ڕەتکردەوە و ڕایانگەیاند، دەبێت سوپای ئیسرائیل لە غەززە بکشێتەوە.

ئەمەش بزانە: دوای ئاگربەستی غەززە، ترەمپ ئەو پلانەی ڕاگەیاند کە غەززە "خاوێن" بکرێتەوە و ئاوارەکان بۆ شوێنێکی "ئارامتر" بگوازرێنەوە.