وادەی سەردانی ئەحمەد شەرع بۆ تورکیا ئاشکرا دەکرێت

ئاڤا نیوز

 

ئەحمەد شەرع، سەرۆککۆماری سووریا لەدوای سەردانەکەی بۆ سعودییە بڕیارە سەردانی تورکیاش بکات. 

 

چیرۆکی سەرەکییەکە: ئەحمەد شەرع سەرۆکی نوێی سووریا، لە دوای کەوتنی دەسەڵاتی بەشار ئەسەد، لە هەوڵی بەردەوام دایە بۆ دووبارە دروستکردنەوەی پەیوەندییە دیبلۆماسییەکان لەگەڵ وڵاتانی دراوسێ و وڵاتانی ڕۆژئاوا، پەیوەندییەکانی نێوان تورکیا و وڵاتەکەشی لە ئاستێکی زۆر باش دایە و بەم سەردانەی دەیەوێت پەیوەندییەکانی نێوان ئەنقەرە و دیمەشق بباتە قۆناغێکی دیکەوە. 

 

زانیاریی بەدەستهاتوو: میدیاکانی تورکیا بڵاویان کردووتەوە، دوای سەردانەکەی بۆ سعودییە بڕیارە شەرع 4و5ی ئەم مانگە سەردانی تورکیا بکات و لەلایەن ڕەجەب تەیب ئەردۆغان، سەرۆککۆمار، وەزیری دەرەوە و سەرۆکی دەزگای هەواڵگری تورکیا لە کۆشکی کۆماری پێشوازی لێدەکرێت. 

 

بۆچی گرنگە؟: بابەتی سەرەکی کۆبوونەوەکە پاراستی سنوورەکانی تورکیایە لە گرووپی چەکداریی پەپەکە، هاوکات بوونی هێزی سووریای دیموکرات (هەسەدە) و یەکخستنی هێزە چەکدارییەکان لە ژێر چەتری سوپای نیشتمانی سووریادا.

 

بابەتە ستراتیژییەکە: بابەتی ئامادەکاریی بۆ پێکهێنانی کابینەی نوێی حکومەتی سووریا و بەرەو پێشبردنی پەیوەندییە نێوان هەردوو وڵات و کارکردن بۆ دووبارە بوونیادنانەوەی سووریا تەوەری سەرەکی کۆبوونەوەکان دەبێت.