سێ پڕۆژە پەسەندکراوەکەی کورد و شیعە و سوننە چاوەڕێی واژۆی سەرۆککۆمارن

ئاڤا نیوز

هەر سێ یاسای هەمواری باری کەسێتی، لێبوردنی گشتی و گەڕانەوەی زەوییە کشتوکاڵییەکان بۆ خاوەنەکانیان لە کەرکووک، ڕەوانەی سەرۆکایەتی کۆمار کراون و چاوەڕێی واژۆی سەرۆککۆمارن بۆ ئەوەی بخرێنەبواری جێبەجێکردنەوە.

چیرۆکی سەرەکی: 21ـی مانگی ڕابردوو پەرلەمانی عێراق یاساکانی باری کەسێتی، لێبوردنی گشتی و گەڕانەوەی زەوییە کشتوکاڵییەکان بۆ خاوەنە ڕەسەنەکانی لە کەرکووک پەسەند کرد کە خواستی شیعە و سوننە و کورد و تورکمان بوون، بەشێک لە پەرلەمانتارانیش سکاڵایان لەسەر دانیشتنەکە لە دادگای فیدڕاڵی تۆمارکردووە و داوای هەڵوەشاندنەوەی کۆبوونەوەکە دەکەن.

زانیاریی بەدەستهاتوو: سەرچاوەیەکی باڵا لە سەرۆکایەتی کۆماری عێراق بە ئاڤا میدیای ڕاگەیاند، ئێوارەی ڕۆژی پێنجشەممە 2025-01-30، لە ئەنجومەنی نوێنەرانەوە هەر سێ پڕۆژەیاساکەی پەیوەست بە کورد، شیعە و سوننەکان گەیشتووەتە سەرۆکایەتی کۆمار و ڕادەستی تیمی ڕاوێژکارانی یاسایی لە سەرۆکایەتی کۆمار کراون.

ئاماژەی بەوەشکرد، دوای ئەوەی تیمی ڕاوێژکارانی یاسایی پێداچوونەوە و وردبینییان بۆ یاساکان کرد، لە نزیکترین کاتدا سەرۆککۆمار واژۆ لەسەر پەسەندکردنی یاساکان دەکات.

ئەوەی پێویستە بیزانیت: بەگوێرەی ماددەکانی 61 و 73ـی دەستووری عێراق، دەسەڵاتدراوە بە سەرۆککۆمار بۆ دەرچواندنی مەرسومی کۆماری بۆ ئەو یاسایانەی کە لە ئەنجومەنی نوێنەرانەوە دەنگی لەسەر دەدرێت بەبێ ئەوەی مافی ڕەتکردنەوەیانی هەبێت، لەو ڕۆژەشی یاساکان دەگەنە سەرۆکایەتی کۆمار، 15 ڕۆژ لەبەردەم لەتیف ڕەشید سەرۆککۆماری عێراقە بۆ ئەوەی واژۆ لەسەر یاساکان بکات.