وەزارەتی سامانە سرووشتییەکان لەبارەی هێرشکردنە سەر کۆرمۆر دڵنیایی دەدات

ئاڤا نیوز

 

وەزارەتی سامانە سرووشتییەکان لەبارەی هێرشەکەی سەر کێڵگەی غازی کۆرمۆر دڵنیایی دەدات کە هیچ زیانێکی نەبووە و بەرهەمهێنانی غاز بەردەوامە. 

چیرۆکی سەرەکی: کاتژمێر 07:05ی خولەکی ئێوارەی ئەمڕۆ، درۆنێکی بۆمبڕێژکراو ئاراستەی کێڵگەی غازی کۆرمۆر کرا لە سنووری چەمچەماڵ، کە سەرچاوەی سەرەکی دابینکردنی غازی ماڵان و کارەبایە بۆ هەرێمی کوردستان.

ڕاگەیێنراوی فەرمی: وەزارەتی سامانە سروشتییەکانی هەرێمی کوردستان ڕایگەیاند: لە هێرشەکەدا هیچ زیانێك بە كێڵگەکە و کۆمپانیای دانە غاز نەگەیشتووە. بەرهەمهێنانی غاز و پەستانی غاز بۆ وێستگەكانی بەرهەمهێنانی كارەبا تا ئێستا ئاساییە، هەڵسەنگاندنیش بۆ زیانە ماددییەکانی هێرشەکە دەكرێت.

لەلایەکی دیکەوە: دژەتیرۆری کوردستان - سلێمانی ڕایگەیاند: بەپێی زانیارییە هەواڵگرییەکان، درۆنەکە لە ناوچەی بەشیرەوە کە دەکەوێتە سنووری کەرکووک لەلایەن گرووپە میلیشیا و یاساشکێنەکانەوە ئاراستە کراوە.


باکگراوند: ئەمساڵ یەکەمجارە کێڵگەکە بۆردوومان بکرێت، بەڵام لە ساڵانی ڕابردوودا چەندینجار بۆردوومان کراوە. مانگی یەکی ساڵی ڕابردوو بە سێ مووشەک کێڵگەکە بۆردوومان کرا و ئاگرێکی گەورەی لێ کەوتەوە، بەهۆیەوە بەرهەمهێننای غازی ماڵان و بەرهەمهێنانی کارەبا لە زۆربەی وێستەگەکان بۆ ماوەیەک وەستا.