پەیامێک لە سوودانییەوە بۆ هەولێر و بەغدا لەبارەی بودجە و نەوت: بەخێرایی دەستبەکار بن

ئاڤا نیوز

سوودانی لەبارەی پەسەندکردنی هەمواری یاسای بودجە داوا لە هەردوو حکومەتی کوردستان و عێراق دەکات ڕاستەوخۆ دەست بە جێبەجێکردنی هەموارەکە بکەن، ئەوەش بە ئامانجی وەبەرهێنانی نموونەیی لە کەرتی نەوتدا.

چیرۆکی سەرەکی: بەمەبەستی دەستپێکردنەوەی هەناردەی نەوتی هەرێمی کوردستان و دیاریکردنی خەرجی بەرهەمهێنان و گواستنەوەی نەوت، ئەمڕۆ پەرلەمانی عێراق دوای مشتومڕێکی چەند مانگی، هەمواری یاسای بودجەی پەسەندکرد.

ڕاگەیێنراوی فەرمی: نووسینگەی ڕاگەیاندنی محەممەد شیاع سوودانی، سەرۆکوەزیرانی عێراق ڕایگەیاند:

٠ پێشوازی لە پەسەندکردنی هەمواری یاسای بودجە لەلایەن پەرلەمانەوە دەکات، بەتایبەتیش کە پەرلەمان ڕەشنووسەکەی حکومەتی وەک خۆی پەسەند کردووە.

٠ داوا لە هەردوو حکومەتی هەرێمی کوردستان و حکومەتی فیدڕاڵی دەکەین ڕاستەوخۆ و دەستبەجێ، دەست بە جێبەجێکردنی هەموارەکە بکەن، ئەوەش بە ئامانجی وەبەرهێنانی نموونەیی لە کەرتی نەوت و گرنگی ڕۆڵی ئەم کەرتەدا لە پشتیوانی ئارامیدا.

٠ بۆ پشتیوانییان لە ڕوانگە و پڕۆژەکانی حکومەت، سوپاسی سەرۆکایەتیی پەرلەمان و سەرجەم پەرلەمانتاران دەکەین.

٠ پەسەندکردنی هەمواری یاسای بودجە بەو ڕەشنووسەی لەلایەن حکومەتەوە نێردرابوو، جەختکردنەوەیە لە ئارامی سیاسی و لێکتێگەیشتن کە پێویستی ئەم قۆناغەن، هاوکات نیشانەی بەهێزی هەماهەنگی نێوان حکومەت و پەرلەمانە.

٠ بۆ قۆناغی داهاتوو حکومەت بەرپرسانە و لەڕوانگەی بەرژەوەندی باڵای عێراقەوە بەرەنگاری ئاستەنگ و کێشەکان دەبێتەوە، ئەم هەنگاوەی ئەمڕۆش هاندەرێکی باش دەبێت بۆ دەستکەوتی زیاتر کە لەئاست پێداویستی ڕۆڵەکانی گەلی عێراقدا بێت.