سوودانی لیژنەیەک بۆ لێکۆڵینەوە لە هێرشەکەی سەر کۆرمۆر پێکدەهێنێت

ئاڤا نیوز

فەرماندەی گشتی هێزە چەکدارەکانی عێراق لیژنەیەکی لێکۆڵینەوەی لەبارەی هێرشەکەی ئەمشەوی سەر کێڵگەی کۆرمۆر لە سنووری قەزای چەمچەماڵ پێکهێنا و ڕایگەیاند، هەر کەسێک دەستی هەبێت لە تێکدانی ئاسایشی وڵاتدا ڕووبەڕووی دەبنەوە و سزای بەسەردا دەسەپێنن.

چیرۆکی سەرەکی: ئێوارەی ئەمڕۆ، درۆنێکی بۆمبڕێژکراو ئاراستەی کێڵگەی غازی کۆرمۆر کرا لە سنووری چەمچەماڵ، کە سەرچاوەی سەرەکی دابینکردنی غازی ماڵان و کارەبایە بۆ هەرێمی کوردستان، هێرشەکەش هیچ زیانێکی گیانی و ماددی نەبوو.

ڕاگەیێنراوی فەرمی: شانەی ڕاگەیاندنی ئەمنیی عێراق بڵاویکردەوە:

- محەممەد شیاع سوودانی، فەرماندەی گشتی هێزە چەکدارەکان بەدواداچوونی بۆ ئەو هێرشە کردووە کە ئەمشەو کرایەسەر کێڵگەی کۆرمۆر و بەهۆیەوە ئاگر کەوتەوە، بەبێ ئەوەی زیانی گیانی و ماددی هەبێت یان کاریگەری لەسەر بەرهەمهێنان لە کێڵگەکەدا دروستبکات.

- سوودانی فەرمانیکردووە لیژنەیەکی لێکۆڵینەوەی ئەمنیی و هونەری بۆ بەدواداچوون لەسەر هێرشەکە پێکبهێنرێت، جەختیشیکردووەتەوە کە فەرماندەی ئۆپەراسیۆنە هاوبەشەکان لەگەڵ هێزەکانی پێشمەرگە لە سلێمانی لە پەیوەندی بەردەوام دایە بۆ ئاگاداربوون لە چۆنیەتی ڕووداوەکە.

- "جەخت دەکەینەوە کە هەر هەوڵێک بۆ تێکدانی ئابووری عێراق و زیانگەیاندن بە بەرژەوەندییەکانی گەلی عێراق کارێکە بەهیچ شێوەیەک لەلایەن هێزە ئەمنییەکانەوە ڕێگەی پێنادرێت، هێزە ئەمنییەکانیش توانای شکستپێهێنان و ڕووبەڕووبوونەوەی هەموو ئەوانەیان هەیە کە کار بۆ تێدانی ئاسایشی ئابووری عێراق دەکەن".