یەکەم هەڵوێستی مەزڵووم عەبدی دوای دیارکردنی ئەحمەد شەرع بە سەرۆککۆماری سووریا

ئاڤا نیوز

 

فەرماندەی گشتیی هێزەکانی سووریای دیموکرات (هەسەدە) ڕایگەیاند، کورد و گەلانی باکوور و ڕۆژهەڵاتی سووریا حکومڕانییەکی خۆبەڕێوەبەرییان لەناو سووریایەکی ناوەندیدا دەوێت، جەختیشیکردەوە کە ئەوان لە دیاریکردنی ئەحمەد شەرع بە سەرۆککۆماری سووریا بۆ قۆناغی ڕاگوزەر بەشدار نەبوون بۆیەش بۆچوونی خۆیانی لەبارەوە نادەن.

 

چیرۆکی سەرەکی: 29ی مانگی ڕابردوو ئەحمەد شەرع، وەکو سەرۆککۆماری سووریا بۆ قۆناغی ڕاگوزەر دیاریکرا، لە کۆبوونەوەکەدا نوێنەرانی باکوور و ڕۆژهەڵاتی سووریا و بەشێکی دیکەش لە پێکهاتەکانی سووریا بەشدار نەبوون.

 

لێدوانی فەرمی: مەزڵووم عەبدی، فەرماندەی گشتی هێزەکانی سووریای دیموکرات بە ئاژانسی ئەسیۆشییەتد پرێسی ڕاگەیاندووە، "ئێمە لە کۆبوونەوەی دەستنیشانکردنی ئەحمەد شەرع بە سەرۆککۆماری کاتی سووریا ئامادە نەبووین و گفتوگۆشمان لەگەڵ نەکراوە بۆیەش بۆچوونی خۆمان لەسەر ئەوە هەنگاوە ناڵێین، بەڵام ئێستا گفتوگۆ لەنێوانماندا هەیە و لەسەر بنەمای گفتوگۆکان هەڵوێستی خۆمان ئاشکرا دەکەین".

 

بەشێکی دیکە لە قسەکانی مەزڵووم عەبدی:-

 

وڵاتانی هاوپەیمان لەوانەش ئەمریکا و بەریتانیا و فەڕەنسا نێوەنگیریی لەنێوان ئێمە و دەسەڵاتدارانی دیمەشق دەکەن.

 

ئێمە دەوڵەتێکی عەلمانی، مەدەنیی و ناناوەندیمان دەوێت کە ڕێز لە هەموو هاووڵاتیانی بەبێ لەبەرچاوگرتنی نەتەوە و مەزهەبیان بگرێت.

 

جیابوونەوە لە سووریا و دامەزراندنی حکومەت و پەرلەمانێکی سەربەخۆمان ناوێت، بەڵکو دەمانەوێت گەلی باکوور و ڕۆژهەڵاتی سووریا حکومڕانییەکی خۆبەڕێوەبەرییان لەناو سووریایەکی ناناوەندیدا هەبێت.

 

دەمانەوێت بەشێک بین لە وەزارەتی بەرگریی سووریا، وردەکارییەکانی ئەم بابەتەش پێویستییان بە گفتوگۆی زیاتر هەیە، ئێمە پێشنیازەکانمان بۆ دیمەشق ناردووە و چاوەڕێی وەڵامی ئەوانین.

 

دوای کەوتنی ئەسەد، داعش دەستی بەسەر ژمارەیەکی زۆر چەکدا گرتووە کە لە بنکەکانی سوپای سووریا بەجێمابوون، بۆیەش مانەوەی ئەمریکا بۆ بەرەنگاربوونەوەی داعش پێویستە، ئاگاداری هیچ بەرنامەیەکی ئەمریکیش بۆ کشانەوە لە سووریا نین.