وەزارەتی سامانە سرووشتییەکان داوا دەکات وەزارەتی نەوتی فیدڕاڵ دەست بە ڕێککارە تەکنیکییەکان بکات

ئاڤا نیوز

دوای ئەوەی ڕۆژی 2ـی شوبات پەرلەمانی عێراق دەنگیدا لەسەر هەمواری یاسای بودجە، وەزارەتی سامانە سرووشتییەکان ڕاگەیێنراوێکی بڵاوکردەوە و داوا دەکات وەزارەتی نەوتی فیدڕاڵ دەست بە ڕێککارە تەکنیکییەکان بکات.

 

وێنە گەورەکە: نزیکەی دوو ساڵ هەناردەکردنی نەوتی هەرێمی کوردستان بۆ بەندەری جەیهان وەستا، بەگوێرەی ئەو زانیارییانەی لەبارەی زیانەکانی وەستانی نەوتی هەرێمی کوردستان بڵاودەکرێنەوە، لەم ماوەیە عێراق 25 ملیار دۆلار زیانی کردووە.

 

ڕاگەیێنراوی فەرمی: وەزارەتی سامانە سروشتییەکان ئەمڕۆ دووشەممە ڕایگەیاند،  پەسەندکردنی هەمواری یاسای بودجەی عێراق تایبەت بە تێچوونی دەرهێنان و گواستنەوەی نەوتی هەرێم لە پەرلەمانی عێراق و دەستپێکردنەوەی هەناردەکردنی نەوتی هەرێمی کوردستان بە هەنگاوێکی ئەرێنی بۆ گەیشتن بە چارەسەری کوتایی دۆسێی نەوت دەزانین.

 

لە ڕاگەیێنراوەکەی سامانە سروشتییەکان ئەمەش هاتووە، "ئومێدەوارین ئەم هەنگاوە دەستپێكی قۆناغێكی نوێ بێت لە چارەسەرکردنی تەواوی کێشەکان و وەزارەتی نەوتی فیدراڵ كار بۆ جێبەجێكردنی یاساكە و تێپەڕاندنی تەواوی کێشەکان و ئامادەکردنی رێكارە تەكنیكییەكانی بكات".

باکگراوند: ڕۆژی 25-3-2023 لەسەر بنەمای بڕیارێکی ژووری ناوبژیوانی دادگەی پاریس، نەوتی هەرێمی کوردستان بۆ بەندەری جەیهان وەستا، بەمەش هەناردەکردنی زیاتر لە 450 هەزار بەرمیلی ڕۆژانەی هەرێمی کوردستان بۆ بازاڕەکانی جیهان ڕاگیرا.