زیاتر لە شەش هەزار مۆلیدەی ئەهلیی لە هەرێمی کوردستان هەیە

ئاڤا نیوز

 

هەوڵەکانی حکومەتی هەرێمی کوردستان بۆ کەمکردنەوەی کاریگەریی پاڵاوگە ناساییەکان و کارگەکان لەسەر پیسبوونی ژینگە بەردەوامە و پرۆژەی ڕووناکی بۆ کارەبای 24 کاتژمێر دیارترینیانە.

 

وێنە گەورەکە: سەرەتای ئەمساڵ سەرۆکوەزیران مەسرور بارزانی، لەگەڵ بەرپرسانی کارگێڕی و ژینگەیی هەولێر و دهۆک کۆبوویەوە و چەند بڕیاریک دران، دیارترینیان داخستنی پاڵاوگە نایاساییەکان بوو، بڕیارەکە لە قۆناغی جێبەجێکردن دایە و هۆشداریش بە پاڵاوگەکان دراوە.

 

لێدوانی فەرمی: ئەحمەد محەممەد، بڕیاردەری ئەنجوومەنی باڵای ژینگەی هەرێم لە دەستەی ژینگە بە ئاڤا میدیای ڕاگەیاند: چەند هۆکارێک بۆ پیسبوونی ژینگە هەیە، پێویستە هەنگاو بە هەنگاو کاریان لەسەر بکریت، هاوکات 57 پاڵاوتگەی نایاسایی لەسەر نەبوونی مەرجە ژینگەییەکان لە هەولێر داخراون.

 

-سەرجەم پاڵاوگەکانی سنووری دهۆک داخراون، مەرجی کردنەوەیان خۆگونجاندنە لەگەڵ ڕێنماییە ژینگەییەکان.

 

لەلایەکی دیکەوە: جگە لەو موەلیدانەی لە ماڵ، ڕێستورانت و شوێنە گشتییەکان هەیە، زیاتر لە شەش هەزار مۆلیدە  کارەبای گەڕەکەکان لە هەرێمی کوردستان دابین دەکەن.

 

گۆشەیەکی دیکەی دیمەنەکە: لە هەرێمی کوردستان نزیکەی دوو ملیۆن و 300 هەزار ئۆتۆمبێل هەیە، نیوەی ئەو ئۆتۆمبێلانە لە هەولێرن و کاریگەریی ڕاستەوخۆیان لەسەر پیسبوونی ژینگە هەیە.

 

خاڵە نەرێنییەکان: پیسبوونی ژینگە 100٪ هۆکاری تووشبوون و زیادبوونی نەخۆشییەکانە، کە دیارترینیان شیرپەنجەیە.

 

بۆچی گرنگە: داخستنی پاڵاوتگە ناساییەکان، کاریگەریی لەسەر پاکبوونەوەی ژینگەی تەواوی هەرێمی کوردستان دەبێت، هاوکات بە جێبەجێکردنی پرۆژەی ڕووناکی کە کارەبای 24 کاتژمێری دابین دەکات، هەزاران موەلیدە لە هەرێمی کوردستان دەکوژێنرێنەوە.