گەشتیاران لەبارەی مامەڵەکردن بە کارتی بانکی ئاگادار دەکرێنەوە

ئاڤا نیوز

 

بەڕێوەبەرایەتیی ئاسایشی سلێمانی چوار ڕێنمایی بۆ بەکارهێنانی کارتی بانکی بڵاوکردەوە و گەشتیاران ئاگادار دەکەنەوە، نابێت جگە لە کارتی خۆیان هەڵگری هیچ کارتێکی دیکەی بانکی بن.

 

 ڕاگەیێنراوی فەرمی: عەقید سەلام عەبدولخاڵق، بەرپرسی ڕاگەیاندن و پەیوەندییەکانی دەزگای ئاسایشی هەرێم بە ئاڤا میدیای ڕاگەیاند، لەماوەی ڕابردوودا چەندین کەس لەسەر مامەڵەکردن بە کارتی بانکی لە فڕۆکەخانەکان دەستگیرکراون، بۆیە گەشتیاران ئاگادار دەکەینەوە لە کاتی گەشتەکانیاندا لە فڕۆکەخانە و دەروازە سنوورییەکان, جگە لە کاتی بانکی خۆیان نابێت هیچ کارتێکی دیکەی بانکیان لابێت، بە پێچەوانەوە تۆمەتبار دەبێت بە یاسای سپیکردنەوەی دراو و پاردارکردنی تیرۆر ژمارە 39ـی ساڵی 2015.

 

ڕاگەیێنراوەکەی دەزگای ئاسایشی هەرێم ئەم خاڵانەش لەخۆ دەگرێت: 

 

- ئەگەر گەشتیار هەڵگری چەند کارتێکی بانکی بوو کە بەناوی خۆییەوە نەبوو، گەشتیار و خاوەنی کارتەکان بەرپرسیارن بەرامبەر بەیاسا و کارتە بانکییەکان دەستی بەسەردا دەگیرێت و بلۆک دەکرێن.

- کڕینەوە یان بەکرێدانی کارتە بانکییەکان کارێکی نایاساییە، بەپێچەوانەوە مامەڵەکار و خاوەنی کارتەکە ڕووبەووی یاسا دەکرێنەوە.

- داواکارین لە هاوڵاتییان پارێزگاری لە بەڵگەنامە کەسییەکانیان بکەن، ڕێگە نەدەن بەکاربهێنرێت بۆ ئەم مەبەستە.