ئیسرائیل شاندێک دەربارەی ئاگربەستی غەززە دەنێرێتە قەتەر

ئاڤا نیوز

 

حکومەتی ئیسرائیل شاندێک دەنێرێتە قەتەر بۆ تاوتوێکردنی قۆناغی دووەمی ئاگربەستی جەنگی کەرتی غەززە.

 

وێنە گەورەکە: دوای ئەوەی 17 ڕۆژی لە قۆناغی یەکەمی ئاگربەستی جەنگ غەززە تێپەڕی کە بە چوار گەڕ چەندین بارمتەی ئیسرائیلی بەرامبەر سەدان بەندکراوی فەلەستین ئازاد کران، گفتۆکانی قۆناغی دووەم و سێیەمی ئاگربەست لەنێوان فەلەستین و ئیسرائیل بە نێوەندگێری چەند وڵاتێك دەستپێدەکاتەوە.

 

ڕاگەیێنراوی فەرمی: نووسینگە بنیامین نەتنیاهۆ، سەرۆکوەزیرانی ئیسرائیل ڕایگەیاند: شاندەکە لە کۆتایی ئەم هەفتەیە دەچێتە دەوحە و گفتوگۆ لەسەر وردەکارییەکانی بەردەوامیی جێبەجێکردنی ڕێککەوتنی ئاگربەستی غەززە دەکەن.

 

زانیاریی زیاتر: ئەمەش لەدوای ئەوە دێت ڕۆژی یەکشەممە، سەرۆکوەزیرانی ئیسرائیل سەردانی ئەمریکای کرد و پێش ئەوەی لەگەڵ دۆناڵد ترەمپ، سەرۆکی ئەمریکا کۆببێتەوە چاوی بە ڕاوێژکارانی تەمپ کەوت.

ئەوەی پێویستە بیزانیت: دوای 15 مانگ لە جەنگ لە کەرتی غەززە، حەماس و ئیسرائیل بە نێوەگیریی قەتەر، ئەمریکا و میسر گەیشتنە ڕێککەوتن بۆ ڕاگرتنی جەنگ بە سێ قۆناغ.

قۆناغی یەکەم: لە شەش هەفتەی یەکەم بزووتنەوەی حەماس، 33 بارمتەی ئیسرائیلی بەرامبەر نزیکەی 1900 دەستگیرکراوی فەلەستینی و کشانەوەی سوپای ئیسرائیل لە ناوچەکانی چڕی دانیشتووان لە غەززە و گەیاندنی هاوکارییە مرۆییەکان بۆ کەرتەکە.
 
-وردەکاریی هەردوو قۆناغەکەی دیکە بەتەواوی ڕوون نییە تاوەکو ڕێککەوتنی لەسەر بکرێت، کە قۆناغی دووەمی 42 ڕۆژ دەخایەبێت و چەند بارمتەی دیکەی ئیسرائیلی ئازاد دەکرێن و لە قۆناغی سێیەمیش، دووبارە ئاوەدانکردنەوەی غەززە دەبێت.