ئەنەکەسە پیرۆزبایی لە ئەحمەد شەرع دەکات: مافەکانی کورد لە دەستووردا بچەسپێنرێن

ئاڤا نیوز

ئەنجوومەنی نیشتیمانی کورد لە سووریا پیرۆزبایی دەستبەکاربوون لە سەرۆککۆماری سووریا بۆ قۆناغی ڕاگوزەر دەکات، داواش دەکات لە دەستووری نوێی وڵاتەکەدا دان بە مافە نەتەوەییەکانی کورد بنرێت و مافەکانی بچەسپێنرێن.

وێنە گەورەکە: 29ی مانگی ڕابردوو بەشێکی فراوان لە لایەن و گرووپەکانی بەشدار لە ڕووخاندنی دەسەڵاتەکەی ئەسەد لە دیمەشق کۆبوونەوە و ئەحمەد شەرعیان وەک سەرۆککۆماری سووریا بۆ قۆناغی ڕاگوزەر دیاریکرد، پێشتریش فەرماندەی گشتی هێزەکانی سووریای دیموکرات ڕایگەیاندبوو، ئەوان لەکۆبوونەوەکە بەشدارنەبوون و تا دوای گفتوگۆکان، ڕای خۆیان لەبارەی دیاریکردنی ئەحمەد شەرع ڕاناگەیێنن.

ڕاگەیێنراوی فەرمی: ئەنجوومەنی نیشتیمانی کورد لە سووریا ڕایگەیاند:

- ئەم قۆناغە پێویستی بە پرۆسەیەکی گشتگیری سیاسیی بە بەشداری هەمووان هەیە.

- جەختیش دەکەینەوە، پێویستە کۆتایی بەو ستەمە مێژوییە بهێنرێت کە گەلی کورد ڕووبەڕووی بووەتەوە، ئەویش بە داننان بە مافە نەتەوەییەکانی لە دەستوور و بەهێزکردنی ڕۆڵی لە هاوبەشی نیشتیمانی و بەدیهێنانی دادپەروەریی و یەکسانیدا.

- داوا لە ئەحمەد شەرع دەکەین هەنگاوی جددی بنێت بۆ کۆتاییهێنان بە نەهامەتی سوورییەکان، بەهێزکردنی ئارامیی و ڕەخساندنی دۆخێکی لەبار بۆ ئەنجامدانی هەڵبژاردنێکی ئازاد و پاک و بێگەرد.

- دەستورێک بنوسرێتەوە کە مافی هەموو سورییەکان گەرەنتی بکات، ئازادییە بنەڕەتییەکان بپارێزێت لەوانەش ئازادی بۆچوون و دەربڕینی بیروڕا، لابردنی کاریگەرییەکانی ستەمکاری ڕژێمی پێشوو، گەرەنتیکردنی گەڕانەوەیەکی پڕ لەئاسایش و شکۆدار بۆ گەڕانەوەی ئاوارەکان لەناویشیاندا خەڵکی عەفرین و گرێسپی و سەرێ کانی.

- سەرکەوتنی ئەم قۆناغە پێویستی بە پرۆسەیەکی گشتگیری سیاسیی بە بەشداری هەمووان هەیە، ئەوەش بنەماکانی دیموکراسی و ڕێزگرتن لە مافەکانی مرۆڤ بەهێزتر دەکات.

- داوای گرتنەبەری بنەمای گفتوگۆ و کراوەیی دەکەین بۆ ڕووبەڕووبوونەوەی ئاستەنگییەکانی ئەم قۆناغە لەجێگەی پەنابردن بۆ توندوتیژیی، هەروەها پشتیوانی لە بنەمای هاووڵاتی یەکسان و سەروەریی یاسا دەکەین.