هاوکاریی هاوپەیمانان بۆ مانگی یەک بەسەر پێشمەرگە دابەشدەکرێت

ئاڤا نیوز

 

ڕۆژی پێنجشەممە هاوکاریی دارایی هاوپەیمانان بۆ مانگى یەک بەسەر ئەفسەر و پێشمەرگەکانی سەر بە دیوانی وەزارەت و یەکەکانی پیادەی وەزارەتی پێشمەرگە دابەش دەکرێت.

 

ڕاگەیێندراوی فەرمی: ئەمڕۆ سێشەممە،4-2-2025، وەزارەتی پێشمەرگەی هەرێمی کوردستان ڕایگەیاند، هاوکاریی دارایی هاوپەیمانان بۆ مانگى یەکی ئەمساڵ کە دەکاتە ڕۆژی پێنجشەممە،6-2-2025، بەسەر لیوا هاوبەشەکانی پێشمەرگە دابەش دەکرێت.

 

زانیاریی زیاتر: وەزارەتەکە ئاشکرای کردووە، لەم مانگەدا سەرووی 40 هەزار پێشمەرگە و ئەفسەرانی سەر بە وەزارەتی پێشمەرگە لە رێگەی پرۆژەی هەژماری من هاوکاری هاوپەیمانان وەردەگرن، ئەمەش ئەوە دەردەخات کە وەزارەتی پێشمەرگە بە پێی خاڵەکانی نامەی لێکتێگەیشتنی نێوان وەزارەتی پێشمەرگەی حکومەتی هەرێمی کوردستان و هێزەکانی هاوپەیماناندا دەڕوات.

 

ئەمەش بزانە: وەکو پشتیوانییەک بۆ پێشمەرگە و یەکخستنەوەی یەکجاریی هێزەکانی پێشمەرگە، هاوپەیمانان مانگانە نزیکەی 25 ملیۆن دۆلار دەدەنە وەزارەتی پێشمەرگە.

 

ئەوەی پێویستە بیزانیت: "هاوپەیمانان دووپاتیان کردووەتەوە کە بەردەوام دەبن لە هاوکاریکردنی هێزەکانی پێشمەرگەی کوردستان"، وەزارەتی پێشمەرگە وا دەلێت. 

 

لەلایەکی دیکە: دابەشکردنی هاوکاریی هاوپەیمانان لەکاتێکدایە کە ئەمریکا هاوکارییە دەرەکییەکانی بە بڕیاری دۆناڵد ترەمپ ڕاگرتووە.