نزیكه‌ی 320 مامۆستای ئایینی خانه‌نشین دەکرێن

ئاڤا نیوز

بڕیاری خانه‌نشینبوونی نزیكه‌ی 320 مامۆستای ئایینی دراوە، مامۆستایانی خۆبه‌خشی ئایینیش داوا ده‌كه‌ن جێگه‌كانیان بە ئەوان پڕبكرێته‌وه‌.

وێنە گەورەکە: ئەمساڵ هەزاران فەرمانبەری حكومەتی هەرێمی كوردستان خانەنشین كران و لە مانگی یەكەوە بڕیارەكە جێبەجێ كرا، مامۆستایانی ئایینیش هاوشێوەی فەرمانبەرانی دیكە كە مووچەیان لە حكومەت هەیە و خانەنشین دەبن، ئەمساڵ لە كۆی دوو هەزار و 700 مامۆستای ئایینیی كە دامەزراون و مووچەیان هەیە، نزیكەی 320 یان خانەنشین دەبن.

کاریگەریی و لێکەوتەکان: خانەنشینبوونی ئەو ژمارە زۆرەی مامۆستایانی ئایینی گرفت دروست دەكات، شوێنەكانیان چۆڵ دەبێت بەتایبەت ئەو مامۆستا ئاینییانەی لە مزگەوتە دوورە دەستەكانن.

ئەوەی پێویستە بیزانیت: وەزارەتی ئەوقاف هەزار و 500 مامۆستای ئایینی خۆبەخشی هەیە کە هەریەک لەو مامۆستایانە مانگانە 250 هەزار دیناریان پێ دەدرێت و لە مزگەوتەكانی هەرێمی كوردستان وتار دەدەن یاخود پێشنوێژی دەكەن، ئێستا ئەو مامۆستا خۆبەخشانە داوا دەكەن لە شوێنی مامۆستا خانەنشینەکان دابنرێن.

ئەمەش بزانە: بۆ گەیاندنی داواکارییەکانییان، ئەمڕۆ لە سلێمانی ژمارەیەك وتاربێژی خۆبەخش لەبەردەم بەڕێوەبەرایەتیی ئەوقاف گردبوونەوە.

زانیاریی تایبەت: بەپێی بەدواداچوونی ئاڤا:

- ئێستا هیچ بیرۆكەیەك لای وەزارەتی ئەوقاف نییە بۆ دانانی مامۆستا خۆبەخشەكان لە شوێنی خانەنشینەكان، چونكە پێویستی بە ڕەزامەندیی هەردوو وەزارەتی دارایی کوردستان  و عێراق هەیە، بەغداش ئامادە نییە هیچ میلاكێك بۆ هەرێمی كوردستان زیاد بكات.

- گرفتێكی دیكەی دامەزراندنی ئەو مامۆستا خۆبەخشانە ئەوەیە كە ژمارەیان هەزار و  500 کەسە زۆر زیاترن لەو ژمارەیەی كە خانەنشین دەبن، ئەگەر بڕیاریشیان لەبارەیەوە بدرێت دەبێت پێوەریان بۆ دابنرێت بەپێی پێویستیی مزگەوتەكان و ساڵانی خزمەتیان.

لێدوانی فەرمی: سەرچاوەیەك لە وەزارەتی ئەوقاف بە ئاڤای ڕاگەیاند، بۆ پڕكردنەوەی شوێنی ئەو مامۆستا ئایینییە خانەنشینانە، سوود لە مامۆستا خۆبەخشەكان وەردەگرن، ڕەنگە بەو هۆیەوە جێگۆڕكێ بە ژمارەیەك مامۆستای ئایینی بكرێت.