بڕێک زێر لە زەوی گوندنشینێکی کورد لە کەرکووک دەدزرێت

ئاڤا نیوز

 

لە گوندی شەناعە سەربە ناحیەی سەرگەڕانە لە سنووری کەرکووک سوپای عێراق شوێنەوارێکی دێرین لە زەوی گوندنشینێکی کورد هەڵدەدەنەوە و دەیدزن.

 

چیرۆکی سەرەکی: سەر لە ئێوارەی رۆژی یەکشەممە هێزێکی سوپای عيراق و حەشدی شەعبی بە نهێنی دەستیان بە هەڵدانەوەی ئەم زەوییە کردوە و رێگەیان بە گوندنشینان نەداوە نزیک ببنەوە تا بۆ رۆژی دواتر کارەکەیان تەواو کردوە و زەوییەکەیان بەو شێوەیە جێهێشتووە.

 

ئەوەی پێویستە بیزانیت: ئەحمەد خاوەنی ئەم زەویەیە و لە باوانییەوە بۆی ماوەتەوە، گومانی لەو هێزەی سوپای عێراق و حەشدی شەعبی هەبووە کاتێک کە پێیان وتوە چەک و تەقەمەنی سەردەمی داعش لە زەوییەکەیدا شاردراوەتەوە، چونکە داعش لە ساڵی 2014 دەستی بەم گوندانە نەگەیشتووە، پۆلیسی ئاگادار کردوەتەوە و دواتر بۆی دەرکەوتوە زەوییەکەی بەشێکە لە شوێنەوارێکی دێرین و ئەو هێزە بەمەبەستی بردنی خشڵ و زێڕ،  زەوییەکەیان هەڵداوەتەوە.

 

ئەوەی لەبارەیەوە دەگوترێت: گووندنشینان زانیارییان لەسەر ناوچەکەیان هەیە و چەندین جار لە کاتی هەڵکەندنی گۆڕ یان کێڵانی زەوییەکانیان، گۆزە و پارچەی شوێنەوارییان دۆزیوەتەوە، هەر ئەمەش هۆکار بووە کە گومانیان لەو هێزە هەبێ.

 

زانیاریی زیاتر: محەممەد ئەنجومەنی گوندەکەیە و زانیاریی پێگەیشتوە کە هێزەکە پسپۆڕێکی شوێنەواریی ئێرانیان لەگەڵدا بووە، بەڵام بەهۆی ئەوەی ڕێگەیان پێنەداوە نزیک بێتەوە، زانیاری نییە چییان لە ژێر ئەو زەوییە دەرهێناوە.

 

بەدواداچوونی تایبەت: ئاڤا بەدواداچوونی بۆ بابەتەکە کرد و دەرکەوت هێزەکە بە بێ ئاگاداریی فەرمانگەی پاراستنی شوێنەواری کەرکووک هاتونەتە ناوچەکە و مەبەست لە هەڵدانەوەی ئەو زەوییەش بوونی خشڵ و زێر بووە.

 

ئەوەی پێشبینی دەکرێت: هەرچەندە نازانرێت ئەم شوێنەوارە سەردەمەکەی دەگەڕێتەوە بۆ کەی ، بەڵام بەپێی بە داواچوونەکانی ئاڤا و بەپێی ئەو پارچە گۆزانەی لە پاش هەڵدانەوەکە بەشکاوی بەجێ ماون ، ئاماژەکان بۆ ئەوەن شوێنەوارەکە بگەڕێتەوە بۆ سەردەمی میتانییەکان.