کەسوکارى ئەنفالکراوانى کۆیە سامپڵی خوێنیان لێوەردەگیرێت

ئاڤا نیوز

ژمارەیەکی دیکە لە کەسوکارى ئەنفالکراوانى سنوورى قەزاى کۆیە سامپڵى خوێنیان لێوەردەگیرێت، بۆ ئەوەى لەگەڵ بەشێک لەو ڕووفاتانەى لە پارێزگای سەماوە کە دۆزرابوونەوە، بەراورد بکرێن.

چیرۆکی سەرەکی: کەسوکارى ئەنفالکراوى سنوورى کۆیە سامپڵى خوێنیان لێوەرەردەگیرێت، سامپڵەکانیش دەبرێنە تاقیگەیەکى تایبەت لە بەغدا، لەگەڵ ئێسک و پروسکى ڕووفاتەکانى سەماوە بەراورد دەکرێن، بڕیارە لە ماوەی نۆ ڕۆژدا 550 کەسی دیکە لە کەسوکاری ئەنفالکراوان سامپلی خوێنیان لێوەربگیرێت.

لێدوانی فەرمی: تاڤگە حەمەساڵح، بەڕێوەبەری شەهیدان و ئەنفالکراوانی کۆیە، بە ئاڤا میدیای ڕاگەیاند: 

- ڕۆژانە نزیکەی 50 کەس سامپڵی خوێنی لێوەردەگیرێت، تیمێکی پزیشکی دادی عێراق و رێکخراوی ICMB بۆ ماوەی نۆ ڕۆژ لە زانکۆی کۆیە دەمێننەوە، تا بەشى دووەمی کەسوکاری ئەنفالکراوان کە ژمارەیان 550 کەسە لەو ماوەیەدا سامپڵی خوێنیان وەربگیرێت و لەگەڵ ڕووفاتەکان بەراورد بکرێن تاوەکو بناسرێنەوە.

- تەواوی سامپڵەکان لە ڕێگەی تاقیگەیەکی تایبەتی بەغدا، پشکنینیان بۆ دەکرێت، تاوەکو ڕووفاتەکان لەو ڕێگەیەوە بناسرێنەوە و پاشان کاری هێنانەوەیان بۆ بکرێت، هاوکات بەڵێنمان پێدراوە هەرکاتێک پشکنینەکان تەواو بوون و ڕووفاتەکان ناسرانەوە کە خەڵکی قەزای کۆیەن، دەگەڕێنرێنەوە بۆ کۆیە و بەخاکیان دەسپێرن.

ئەوەی پێویستە بیزانیت: ژمارەی ئەنفالکراوەکان لە سنووری قەزای کۆیە نزیکەی 900 کەسە، لەو ژمارەیە ڕووفاتی 172 یان لە دەشتی سەماوەوە هێندراوەتەوە کوردستان و لە چەمچەماڵ نێژراون.