حکومەتی هەرێمی کوردستان بڕیاری دەستپێکردنەوەی هەناردەکردنەوەی نەوتی دەرکرد

ئاڤا نیوز

لە کۆبوونەوەی ئەمڕۆ چوارشەممەی ئەنجوومەنی وەزیرانی حکومەتی هەرێمی کوردستان بڕیاری دەستپێکردنی ڕێکارەکانی هەناردەکردنەوەی نەوتی کوردستانی درا.

چیرۆکی سەرەکی: پەرلەمانی عێراق، ڕۆژی یەکشەممە 2025-02-02، هەمواری یاسای بودجەی سێ ساڵەی 2023 و 2024 و 2025ـی پەسندکرد، کە مادەی 12ـی تایبەت بە دۆسیەی بەرهەمهێنان و گواستنەوەی نەوتی هەرێمی کوردستان بوو.

زانیاری بەدەستهاتوو: بە پێی زانیارییەکانی ئاڤا، لە کۆبوونەوەی ئەمڕۆی ئەنجوومەنی وەزیرانی هەرێمی کوردستان بەکۆی دەنگ بڕیاردرا بە دەستپێکردنی ڕێکارەکانی هەناردەکردنەوەی نەوت.

لە لایەکی دیکەوە: ڕێکارەکانی گواستنەوەی خانەنشینی پێشمەرگە، سەربازی، هێزەکانی ئاسایشی ناوخۆ، شایستەکانی کەسوکاری شەهیدان و ئەنفالکراوان بۆسەر بەڕێوەبەرایەتی گشتیی خانەنشینی وەزارەتی دارایی و ئابووری پەسەند کرا.

باکگراوند: لەسەر داوای عێراق لە 25ـی ئاداری 2023 هەناردەکردنی نەوتی هەرێمی کوردستانی بۆ دەرەوە لە ڕێگەی تورکیاوە ڕاگیرا، دوای بڕیاری ناوبژیوانی کە لە ژووری بازرگانی نێودەوڵەتی دەرچوو، بڕیاردرا ئەنقەرە قەرەبووی هەناردەکردنی بێ مۆڵەت لەلایەن حکومەتی هەرێمی کوردستانی عێراق لە نێوان ساڵانی 2014 بۆ 2018 بداتە بەغدا.