مووچەی پەرلەمانتارانی خانەنشینکراو هاوتای عێراق ناکرێت

ئاڤا نیوز

هەرچەندە خانەنشینە پلە تایبەتەکان مووچەی مانگی یەک بە هاوتاکراوی وەردەگرن، بەڵام پەرلەمانتارانی خانەنشینکراو مووچەکانیان هاوتای عێراق ناکرێت.

ئەوەی پێویستە بیزانیت: پرۆسەی هاوتاکردنی مووچەی نزیکەی دوو هەزار خانەنشینانی پلە تایبەت لە دهۆک و هەولێر تەواو بووە، تەنیا هی پەرلەمانتارەکان ڕاگیراوە و ئەم مانگە هاوتای عێراق نەکراوە.

ئەمەش بزانە: لە پرۆسەی هاوتاکردن خزمەتی زیاتر و بڕوانامە ڕۆڵ دەبینێت، بەڵام بڕوانامە بۆ مردوو هەژمارناکرێت، بەمەش مووچەی بەشێکیان کەمدەبێتەوە.

لێدوانی فەرمی: سەرچاوەیەکی باڵا لە بەڕێوەبەرایەتیی گشتی خانەنشینی کوردستان بە ئاڤای گوت، "سەرجەم خانەنشینە پلە تایبەتەکان جگە لە پەرلەمانتاران کە بە بڕیارێک هاوتاکردنیان بە عێراق وەستاوە، هاوتای عێراق کراون."

هۆکارە زانراوەکان: هۆکاری ڕاگرتنی هاوتاکردنی مووچەی پەرلەمانتاران بۆ ئەوە دەگەڕێتەوە کە ئیمتیازاتی پەرلەمانتاران لە کوردستان و عێراق جیاوازە، دەبێ میکانیزمێکی نوێیان بۆ دابنرێت، ئەسڵەن مووچەیان لەگەڵ پەرلەمانتارانی عێراق هاوتا ناکرێت، بەڵام وەزیر و بەڕێوەبەرە گشتییەکان و پلە تایبەتەکانی دیکە هەمان ئیمتیازاتی عێراقیان هەیە.