ئەحمەد شەرع بە سەردانێکی فەرمی دەچێتە پاریس

ئاڤا نیوز

سەرۆکی فەڕەنسا پیرۆزبایی دەستبەکاربوون لە سەرۆککۆماری سووریا بۆ قۆناغی ڕاگوزەر دەکات و هاوکات بە فەرمی بانگهێشتی دەکات بۆ پاریس.

چیرۆکی سەرەکی: درەنگانی شەوی ڕابردوو لە پەیوەندییەکی تەلەفۆنیدا ئیمانوێل ماکرۆن، سەرۆکی فەڕەنسا پیرۆزبایی دەستبەکاربوونی لە ئەحمەد شەرع وەک سەرۆکی قۆناغی ڕاگوزەری سووریا کرد و پشتیوانی وڵاتەکەی بۆ پڕۆسەی سیاسی و یەکپارچەیی سووریا و سەروەری خاکەکەی دووپات کردەوە.

ڕاگەیێنراوی فەرمی: بە گوێرەی ڕاگەیێنراوی سەرۆکایەتی کۆماری سووریا لە پەیوەندییە تەلەفۆنییەکەدا ئیمانوێل ماکرۆن، سەرۆکی فەڕەنسا، پیرۆزبایی دەستبەکاربوون و ئازادکردنی وڵاتەکەی لە دەستی ڕژێمی ئەسەد کرد و پشتیوانی خۆی بۆ قۆناغی ڕاگوزەری سووریا دووپات کردەوە.

بەگوێرەی ڕاگەیێنراوەکە، لە پەیوەندییە تەلەفۆنییەکە:

- ماکرۆن هەوڵی وڵاتەکەی بۆ هەڵگرتنی سزاکانی سەر سووریا بۆ گەشەپێدان و ئاوەدانیی سووریا دووپات کردەوە.

- هەماهەنگی نێوانیان بۆ ڕووبەڕووبوونەوەی ئاڵنگارییەکانی کە دێنە بەردەم پێشکەوتنی سووریا، لەگەڵ پاراستنی ئارامی و سەقامگیری وڵاتەکە دووپات کردەوە.

- ماکرۆن پشتیوانی وڵاتەکەی بۆ پرۆسەی سیاسی و یەکپارچەیی سووریا و سەروەری خاکەکەی دووپات کردەوە.

- ئەحمەد شەرع، سوپاسی سەرۆک ماکرۆنی کرد لەگەڵ پشتیوانیی فەڕەنسا لە گەلی سووریا لەماوەی 14 ساڵی ڕابردوو، دووپاتیشی کردەوە کە سووریا دەبێتە کاراکتەرێکی چالاک لە ناوچەکە و جیهان.

ئەوەی پێویستە بیزانیت: ئەحمەد شەرع، سەرۆکی سووریا بۆ قۆناغی ڕاگوزەر، لە دووەم سەردانی فەرمی بۆ دەرەوەی وڵات ڕۆژی 4ـی شوبات گەیشتە ئەنقەرە و لە کۆشکی کۆماریی، لەگەڵ ڕەجەب تەیب ئەردۆغان سەرۆککۆماری تورکیا کۆبوونەوە.