سەرۆک بارزانی پیرۆزبایی یادی ڕاگەیاندنی یەکگرتووی ئیسلامیی کوردستان دەکات

ئاڤا نیوز

بەبۆنەی ساڵیادی ڕاگەیاندنی یەکگرتووی ئیسلامیی کوردستان، سەرۆک بارزانی پیرۆزبایی لە ئەمینداری گشتی و ئەندام و لایەنگرانی ئەو حیزبە دەکات.

چیرۆکی سەرەکی: ئەمڕۆ پێنجشەممە، 2025-02-06، بەبۆنەی 31ـەمین ساڵیادی ڕاگەیاندنی یەکگرتووی ئیسلامی کوردستان، سەرۆک بارزانی پەیامێکی پیرۆزبایی ئاراستەی ئەمینداری گشتی ئەو حزبە کرد و ڕۆڵ و کاریگەریی یەکگرتووی بەرز نرخاند.

پەیامی فەرمی: "بەبۆنەی 31ـەمین ساڵیادی ڕاگەیاندنی یەكگرتووی ئیسلامیی كوردستان پیرۆزبایی لە برای بەڕێز مامۆستا سەڵاحەددین محەممەد بەهائەددین ئەمینداری گشتیی یەكگرتووی ئیسلامیی كوردستان و سەركردایەتی و ئەندام و لایەنگرانی یەكگرتووی ئیسلامیی دەكەم و هیوای سەركەوتن و بەردەوامیان بۆ دەخوازم".

لەو یادەدا پێزانینمان بۆ ڕۆڵ و كاریگەریی یەكگرتووی ئیسلامیی و سەركردایەتییەكەی لە پڕۆسەی سیاسیی كوردستان و عێراق و هەڵوێستەكانیان لە وێستگە جیاجیاکاندا هەیە. هەروەها جەختیش لە پێویستیی پێكەوەیی و تەبایی نێوان لایەنە سیاسییەكان و دەستگرتن بە هێڵە ستراتیژییەكان و بەرژەوەندییەكانی گەلەكەمان دەكەینەوە.