شەڕێکی سەخت لە نێوان هەسەدە و گرووپە چەکدارەکان لە حەسەکە ڕوودەدات

ئاڤا نیوز

ڕوانگەی سووری بۆ مافەکانی مرۆڤ بڵاویکردەوە کە تورکیا و گرووپە چەکدارەکانی نزیک لەو وڵاتە بە چڕی بۆردوومانی شاری حەسەکە دەکەن.

وێنە گەورەکە: ئەم هێرشانە لە کاتێکدایە کە گرژییەکان لە باکووری ڕۆژهەڵاتی سووریا لە زیادبوون دایە، بە تایبەت لە بەنداوی تشرین و دەورووبەری.

ڕاگەیێندراوی فەرمی: ئەمڕۆ پێنجشەممە، 06-02-2025، ڕوانگەی سووری بۆ مافەکانی مرۆڤ بڵاوی کردەوە:

- تۆپخانەکانی تورکیا و گرووپە چەکدارەکانی نزیک لەو وڵاتە بە چڕی گوندەکانی دەردەرە، ئەبوش، ئوم ئەلکیف و تەل تەویل لە ناوچەی تل تەمر لە باکووری حەسەکە تۆپباران دەکرێن.

- تاوەکو ئێستا قەبارەی زیانە گیانییەکان نازاندرێت، بەڵام زیانی زۆری ماددی بە زەوییە کشتووکاڵیەکانی ئەو ناوچەیە گەیشتووە، ئەمەش لە کاتێکدایە کە پێشوتریش ژمارەیەک جووتیار لە هەمان ناوچە ببوونە قوربانی.

ئەوەی پێویستە بیزانیت: هەر چەندە ئەمریکا و هاوپەیمانان چەند بنکەیەکی سەربازییان لە شاری حەسەکە جێگیرکردووە، بەڵام ئەوە نەبووەتە ڕێگر لە بەرامبەر وەستانی یەکجاری هێرشەکانی گرووپە چەکدارەکان بۆ سەر ئەو ناوچەیە.

ئەمەش بزانە: ژمارەی دانیشتووانی حەسەکە ملیۆنێک و 512 هەزار کەسە، نەتەوەکانی کورد و عەرەب و ئەرمەن لەم پارێزگایە دەژین، ئەم پارێزگایە بە بیرە نەوتەکانی لەسەر ئاستی سووریا و ناوچەکە ناسراوە.