ئەوقاف لە پرسی ڕێگریكردن لە قورئانخوێندنی كەسانی بیانی لە مزگەوتەكان ڕوونكردنەوە دەدات

ئاڤا نیوز

وەزارەتی ئەوقاف و کاروباری ئاینیی لە بارەی ڕێگریكردن لە قورئانخوێندن و پێشنوێژی كەسانی بیانی لە مزگەوتەكانی كوردستان، دەڵێت مەبەستمان سەرجەم ئەو چالاكی و قورئان خوێندنانەی كەسانی بیانییە كە بە بێ مۆڵەت و ڕێگەپێدانی وەزارەت دەكرێت.

چیرۆكی سەرەكی: نووسراوێكی فەرمی لە وەزارەتی ئەوقاف و كاروباری ئایینیی حكومەتی هەرێمی كوردستان دەرچوو، تێیدا بەڕێوەبەرایەتییەكانی سەر بە وەزارەتەكە ڕاسپێردراون كە سەرجەم مزگەوتەكان ئاگاداربكەنەوە، ڕێگە نەدرێت كەسانی بیانی لەنێو مزگەوت و شوێنە ئایینیەكان كاری پێش نوێژی و وتاربێژی و قورئانخوێنی و بانگبێژی بكەن یاخود هەر چالاكییەكی دیكەی ئایینی بكەن، بەدواداچوونی وردیش بۆ ئەم بابەتە بكرێت.

ڕاگەیێنراوی فەرمی: وتەبێژی وەزارەتی ئەوقاف و كاروباری ئایینیی حكومەتی هەرێمی كوردستان دوای بڵاوبوونەوەی نووسراوی ژمارە 422 كە لە 2-2-2025 گشتاندنی پێكراوە، ڕوونكردنەوەیەكی داوە و ئاماژە بەوە دەكات،

- چالاکی ئایینی و پێشنوێژی، یان قورئانخوێنی لەلایەن کەسانی بیانی (بەڕێگە پێدان)ی لایەنە پەیوەندارەکانی وەزارەتی ئەوقاف و کاروباری ئایینی کارێکی ئاساییە، لەم ڕووەوە پێشوازی لە ھەر چالاکیەک لەچوارچێوەی ڕێنماییەکان دەکەین.
‎
- ئەوەی کە ڕێگە پێدراو نییە، مەبەست لێی ئەو کەسانە پێویستە پێشوەختە (مۆڵەت) لە وەزارەت داوا بکەن تاوەکو ڕەزامەندی وەربگیرێت. هەروەک لە هەموو وڵاتانیش بەم شێوازەیە، ئەمەش پارێزگاریکردنە لە شوێنێکی پیرۆز کە مزگەوتە.

باکگراوند: لەماوەی ڕابردوودا ژمارەیەك كەس و لایەنی سیاسی بۆ مەرام و مەبەستی جۆراوجۆر، بەبێ ئاگاداری لایەنە پەیوەندیدارەكانی حكومەت و دەزگا فەرمییەكان و بەبێ وەرگرتنی مۆڵەتی فەرمی، كەسانێكیان بەناوی قورئانخوێنی نێودەوڵەتی دەهێنا و لە مزگەوتەكان بۆنەی ئایینییان ڕێكدەخست، حكومەتی هەرێمی كوردستان بەپێویستی زانی هاوشێوەی سەرجەم وڵاتانی جیهان ئەو مەراسیم و بۆنە ئایینیانە بە ڕێكاری یاسایی و كارگێڕێ ڕێكبخرێت و لەو چوارچێوەیەش نووسراوێکی دەرکرد بە ڕێگریکردن لە قورئانخوێندن و پێشنوێژیکردنی کەسانی بیانی لە مزگەوتەکانی کوردستان.