لە ڕانیە کەپەکی گەنم و جۆیان ڕەنگکردووە و بە سماق فرۆشتوویانە

ئاڤا نیوز

لیژنەکانی قایمقامیەتی قەزای ڕانیە لە حاجیاوا دەستیانگرتووە بەسەر بڕێکی زۆر تێکەڵەی هاڕاو کە بەناوی سماق فرۆشراوە، بەڵام دوای پشکنین دەرکەوتووە سماق نییە، بەڵکو کەپەکی گەنم و جۆیە و لەگەڵ چەند ماددەیەکی دیکە تێکەڵکراوە و ڕەنگی وەک سماق لێکراوە.

لێدوانی فەرمی: کارزان سلێمان، سەرۆکی لیژنەکانی قایمقامیەتی قەزای ڕانیە بە ئاڤا میدیای ڕاگەیاند:

- ئەو کۆگایە لە قەزای حاجیاوا بوو، لە کۆگاکە 150 کیلۆ لە تێکەڵەی دەستکرد هەبوو. ئەو تێکەڵەیە لەناو کیسی نایلۆن دانرا بوو، هیچ ناونیشانێک لەسەر کیسەکان نییە تەنیا لەسەری نووسراوە "سماقی وردی نایلۆن"، لە سنووری پارێزگای هەولێر بەرهەم دێت.

- کاتێک نمونەی هاڕاوەکەمان بردە تاقیگە، بۆمان دەرکەوت سماق نییە، بەڵکو کەپەکی گەنم، جۆ، لیمۆندوزی، خوێ، ڕەنگی دەستکرد و تامی لیمۆیە، تێکەڵکراوە و بەناوی سماقی وردکراو دەفرۆشرێت. ئەو تێکەڵە ڕەنگکراوە زیانی زۆری بۆ مرۆڤ هەیە.

لەلایەکی دیکەوە: سەبارەت بەو بەرهەمە ساختەیە، ئاڤا میدیا پەیوەندی بە نەبەز عەبدولحەمید، قایمقامی هەولێر کرد و ئەو وتی، بەدواداچوونی ورد دەکەین و ناهێڵین بابەتی ساختە ساغبکرێتەوە و بەرهەم بێت.