لەمەودوا ڕێگە نادرێت قورئانخوێنی بیانی لە مزگەوتەكان پێشنوێژی بكەن

ئاڤا نیوز

چیتر ڕێگە نادرێت قورئان خوێنی بیانی لە مزگەوتەكانی كوردستان پێشنوێژی بكات و بانگ بدات.

وێنە گەورەكە: نووسراوێكی فەرمی لە وەزارەتی ئەوقاف و كاروباری ئایینیی حكومەتی هەرێمی كوردستان دەرچووە، تێیدا بەڕێوەبەرایەتییەكانی سەر بە وەزارەتەكە ڕاسپێردراون كە سەرجەم مزگەوتەكان ئاگاداربكەنەوە، ڕێگە نەدرێت كەسانی بیانی لەنێو مزگەوت و شوێنە ئایینییەكان كاری پێش نوێژی و وتاربێژی و قورئانخوێنی و بانگبێژی بكەن، بەدواداچوونی وردیش بۆ ئەم بابەتە بكرێت.

نووسراوی فەرمی: وەزارەتی ئەوقاف و كاروباری ئایینیی حكومەتی هەرێمی كوردستان بە نووسراوی ژمارە 422 كە لە 2-2-2025، كە وێنەیەكی بۆ ئاڤا میدیا ڕەوانە كراوە، گشتاندن بۆ سەرجەم مزگەوتەكان ڕەوانە دەكات كە ڕێگە نەدرێت بەهیچ شێوەیەك كەسانی بیانی لەنێو دەزگاكانی وەزارەت و شوێنە ئایینیەكانی دیكە، چالاكی ئایینی ئەنجام بدەن.

هۆكارە زانراوەكان: لەماوەی ڕابردوودا ژمارەیەك كەس و لایەنی سیاسی، بەبێ ئاگاداری لایەنە پەیوەندیدارەكانی حكومەت و دەزگا فەرمییەكان و بەبێ وەرگرتنی مۆڵەتی فەرمی، كەسانێكیان بەناوی قورئانخوێنی نێودەوڵەتی دەهێنا جا بۆ هەر مەرام و مەبەستێك بووایە، تەنانەت بەشێك لەو كەسە بیانییانە لەئاستی قورئانخوێنی نێودەوڵەتی نەبوون، لەسەر ئاستی وڵاتی خۆشیان بەناوبانگ نەبوون نەك لەسەر ئاستی نێودەوڵەتی، بەشێكیان بەشێوازێكی سەیر قورئانیان دەخوێند كە زیاتر ئاواز و شێواز و مۆركی مەزهەبێكی دیاریكراوی پێوە دیاربوو، پێچەوانەی شێوازی شەرعی و ڕێپێدراوی قورئانخوێندن بوو. بەشێكیان بەناوی بانگخواز بانگهێشت دەكران كە لەڕووی یاساییەوە ڕێگپێدراو نین.