ئاڤا بەدواداچوون بۆ چیرۆکی گیانلەدەستدانی وریا حەمە کەریم دەکات

ئاڤا نیوز


کاتژمێر 5:30 بەرەبەیانی بەهۆی ڕووداوێکی هاتووچۆ وریا حەمە کەریم، میدیاکارەکەی شاری هەڵەبجە گیانی لەدەستدا.

چیرۆکی سەرەکی: ئەم بەیانییە وریا حەمە کەریم بۆ کارێکی ڕۆژنامەوانی لەهەڵەبجەوە بۆ سلێمانی بەڕێ دەکەوێت، لەنزیک بازگەی عەربەت کاتێک دەبینێت ئۆتۆمبێلێک لایداوە و پەکی کەوتووە، لا دەدات و دەچێت بەدەم خاوەنەکەی، بۆئەوەی هاوکاری بکات. وریا حەمە کەریم لەکاتی یارمەتیدانی ئەو خاوەن ئۆتۆمبێلەی کە پەکی کوتبوو، لۆرییەک لەولاوە دێت و ئستۆپی نەمابوو، خۆی دەکێشێ بەوریا و شۆفێرەکەی تر و هەردووکیان گیان لەدەست دەدەن.

چیرۆكی ڕووداوەكە

- وریا پێشتر لە یەکێک لە بەرنامەکانیدا کە هی چوار مانگ پێش ئێستایە، لە کۆتاییەکەیدا لۆرییەک دەدا بە پاڵیدا، دەڵێ، پەپولە گیان بەخوا ئەم لۆرییە ڕزاوە، وابزانم دۆینەی ئەمساڵ ناخۆین و لۆریەک خۆی دەکێشێ پێماندا.

- وریا حەمە کەریم، میدیارێک بوو، بووبووە دەنگ و ڕەنگ هەڵەبجەیی و هەورامییەکان، جوانییەکانی هەڵەبجەو کۆمەڵگای هەورامانی پیشان دەداو چاوپۆشیشی لە ناشیرینی و خراپیی هەندێک لە بەرپرسە حیزبی و حکومییەکان نەدەکرد، هەربۆیە هەندێک جار وەکو خۆی دەیوت هەڕەشەی کوشتنیان لێکردووە.

ژیانی وریا حەمە کەریم

- وریا لە ساڵی 1987 لە دایک بووە، تاقانەی دایک و باوکی بووە و تەمەنی تەنیا چەند مانگێک بووە، ڕژێمی سەدام حوسێن باوکیان زیندەبەچاڵ کردووە و  وەکو دەیان هەزار منداڵی دیکەی هەڵەبجە و کوردستان دوور لە  بۆن و نازی باوکایەتی گەورەبووە.

- دایکی لەم چەند ساڵەی ڕابردوودا تووشی شێرپەنجە بووە، وریا بەڵێنی دابوو بیبات بۆ ئەورووپا بۆ چارەسەر،  بەڵام مەرگ ڕێگەی نەدا.

- دایکی ئەمرۆ لەسەر گۆڕی وریای تاقانەی، وا دەرکەوت ئەمرۆ سەبر و ئارامی هەموو جیهان بەخشراوە بەو، دەیگوت "خوایە سپاردم بەتۆ، خۆت دەزانیت چی باشە".

ئەوەی پێویستە بیزانیت: ئەو لۆرییەی بووە هۆی گیانلەدەستدانی وریا، تەماتەی قاچاخی لە ئێرانەوە هێناوە بۆ سلێمانی، لەکاتێکدا هاوردەکردنی تەماتەش قەدەغەکراوە.