لیژنەی چاودێری و بەدواداچوون پشكنین بۆ ژمارەیەك بەنزینخانەی پارێزگای دهۆک دەکەن

ئاڤا نیوز

چاودێری و بەدواداچوونی کوالێتی و دابەشکردنی بەنزینی حکومی بەردەوامە و لیژنەی باڵای چاودێریكردنی بەنزینخانەكان چوونەتە پارێزگای دهۆك و ئیدارەی سەربەخۆی زاخۆ.

وێنە گەورەکە: خراپی کوالێتی بەنزینی بەشێک لە بەنزینخانەكان، شۆفێرانی هەرێمی کوردستانی نیگەران کردووە و گرفتی تەكنیكی بۆ ئۆتۆمبێلەكانیان دروست كردووە، پێشتر ئاڤا میدیا بەدواداچوونی بۆ ئەو بابەتە كرد و ئاشكرای كرد بەشێک لە بەنزینخانەکانی هەرێمی کوردستان ساختەکاری لە بەنزیندا دەکەن و فێربوون بەنزینی نۆرماڵ لە کۆمپانیاکانی لاناز و کار دەکڕنەوە، لەگەڵ نەوت، ئاو، ماددەی میتانۆ و چەند ماددەیەکی دیکە تێکەڵی دەکەن کە لە ئێرانەوە هاوردە دەکرێن بۆ ئەوەی ئۆکتانەکەی بەرز ببێتەوە و لیتری بە 750 دینار دەفرۆشن، بەهۆی ئەوەش دەیان بەنزینخانەی حكومی و ئەهلی سزا دران كە كوالێتی بەنزینەكەیان هاوتای ڕێنماییەكانی وەزارەتی سامانە سروشتییەكان نەبوو.

ڕاگەیێنراوی فەرمی: ماڵپەڕی فەرمی وەزارەتی سامانە سروشتییەكانی هەرێمی كوردستان بڵاویكردووەتەوە، لەمیانی درێژەدان بە کارەکانی لیژنەی چاودێری و بەدواداچوونی کوالێتی و بەڕێوەچوونی کاری دابەشکردنی بەنزینی نۆرماڵی 750 دیناری، بە سەرپەرشتیی فەلاح مەولوود، بەڕێوەبەری گشتیی وەبەرهێنانی كانزایی، سەردانی پارێزگای دهۆک و سنووری ئیدارەی سەربەخۆی زاخۆی كرد و ژمارەیەك بەنزینخانە پشكنینیان بۆ كرا كە بەنزینی نۆرماڵی 750 دینارییان پێ دەدرێت.

ئەوەی پێویستە بیزانیت: لە دهۆک و زاخۆ 227 بەنزینخانەی حکومی و ئەهلی هەن و ڕۆژانە لەلایەن لیژنە بەرکارەکانی بەدواداچوونی سووتەمەنی لەژێر ڕێنمایی وەزارەتی سامانە سرووشتییەکان پشکنینیان بۆ دەکرێت، لە کوالێتی و جۆری بەنزینەکانیان دەکۆڵنەوە و سزایان بۆ دەبڕنەوە. لەماوەی ڕابردووشدا دەیان بەنزینخانەی سنووری دهۆك و زاخۆ سزا دران.