چیرۆكی پشت ئەم وێنە میدیاكانی سوێد دەتەنێت

ئاڤا نیوز

وێنەی خانمێكی سووری كە خەڵتانی خوێن بووە، دەبێتە باسوخواسی میدیاكانی سوێد و بەكارهێنەرانی تۆڕە كۆمەڵایەتییەكان، هەمووان وەك پاڵەوان وەسفی دەكەن.

چیرۆكی سەرەكی: مەروە خانمێكی خەڵكی سووریایە و دانیشتووی سوێدە، لەهەمان ئەو خوێندنگەیەی شاری ئۆریبرۆ دەیخوێند كە لە ڕووداوی تەقەكردنەكەی 4ـی ئەم مانگە، 11 كەسی لێ كوژرا، كاتێك تەقەكەرەكە بەشێوەی هەڕەمەكی تەقەی دەكرد و هاوڕێكانی بۆ پاراستنی ژیانی خۆیان ڕایان دەكرد، ئەو لە خوێندنگەكە ماوەتەوە و سەرجەم ئەو بریندارانەی بۆ دەرەوە گواستووەتەوە و گەیاندوویەتی بە ئۆتۆمبێلەكانی پۆلیس و فریاكەوتن.

ئەوەی لەبارەیەوە دەوترێت: پۆلیس و هێزە ئەمنییەكانی سوێد و ماڵپەڕ و كەناڵە فەرمی و نافەرمییەكانی ئەو وڵاتە، ڕۆڵی قارەمانانەی مەروە دەگێڕنەوە كە چۆن بەرگری لە هاوڕێكانی كردووە.

- ڕۆژنامەی 'ئافتۆنبلادێت'ـی سوێدی دەنووسێت: "مەروە لەناو شەڕ و جەنگدا گەورە بووە، بۆیە شارەزایەكی باشی لە ڕزگاركردنی قوربانییەكان هەبووە".

- بەكارهێنەرانی تۆڕە كۆمەڵایەتییەكان لە سوێد بەشێوەیەكی بەربڵاو هاژتاگی "زۆر سوپاس مەروە تۆ پاڵەوانی" ئاماژە پێ دەكەن.

ئەوەی پێویستە بیزانیت: مەروە لە خوێندنگەی ڕێسبێرگسكا له‌ شاری ئۆریبرۆ لەبواری پەرستاری دەیخوێند. هەمان ئەو قوتابخانەیەیەی دووچاری ڕووداوی تەقەكردن بووەوە كە سەرۆكوەزیرانی سوێد، وەك خراپترین و دڕندانەترین ڕووداوی تەقەكردنی بەكۆمەڵ لەمێژووی سوێد وەسفی كرد.

باكگراوند: ڕۆژی 4-2-2025، كەسێك بە چەندین چەكی جۆراوجۆرەوە هەڵیكووتایە سەر قوتابخانەی ڕێسبێرگسكا لە سەنتەری شاری ئۆریبرۆ، بە هەڕەمەكی تەقەی كرد و بەهۆیەوە 11 كەس لە نەتەوە جیاوازەكانی نیشتەجێی سوێد كوژران، دوای ڕووداوەكە پۆلیسی سوێد ڕایگەیاند، ئەوەی زانراوە تەقەكەرەكە سەر بە هیچ گروپ و ڕێكخراوێكی تیرۆریستی نەبووە، بەڵكو كەسێكی گۆشەگیر بووە و نەخۆشی دەروونی هەبووە و دوای ڕووداوەكە خۆی كوشتووە.