لە باكووری كوردستان بەفر ڕێگەی دەیان گوند و شارۆچكە دادەخات

ئاڤا نیوز

بەهۆی كەڵەكەبوونی بەفر و شەختەی شەقامەكان و نزمبوونەوەی پلەكانی گەرما بۆ خوار سفری سەدی، هاتووچۆ لە شەقامەكانی بەشێكی زۆری ناوچەكانی باكووری كوردستان و توركیا پەكی كەوتووە، لە قوتابخانەكانی چوار پارێزگای باكووری كوردستانیش بەم هۆیەوە كرایە پشوو.

وێنە گەورەكە: شەپۆلێكی سەرما و سۆڵە و بەفر و بارانبارین، وڵاتانی ڕۆژهەڵاتی ناوەڕاستی گرتووەتەوە، شەپۆلەكە لە وڵاتی توركیا كاریگەرییەكەی زیاترە، بەهۆی خراپی ڕێگاكان و دروستبوونی ئاستەنگی هاتووچۆ، دەسەڵاتی كارگێڕی چوار پارێزگای باكووری كوردستان و 16 پارێزگای دیكەی توركیا، دەرگەی ناوەندەكانی خوێندنیان داخست و كرایە پشوو.

ڕاگەیێنراوی فەرمی: ئاژانسی هەواڵی ئەنادۆڵی توركی، لەزاری بەرپرسانی كارگێڕیی پارێزگاكانی سێواز، چەولیگ، ئەرزەڕۆم و ئەردەخان لە باكووری كوردستان بڵاویكردووەتەوە، سبەی شەممە 8-2-2025، بەهۆی كەڵەكەبوونی بەفر و دابەزینی پلەكانی گەرما بۆ خوار سفری سەدی، دەوامی قوتابخانەكان كرایە پشوو.

زانیاریی زیاتر: هەر لە پارێزگاكانی باكووری كوردستان، ڕێگای هاتووچۆی نێوان دەیان گوند و شارۆچكە بەتەواوی پەكی كەوتووە و وەستاوە، تیمەكانی فریاگوزاری دەستیان كردووە بە ڕاماڵینی بەفر و پاككردنەوەی ڕێگاكان، هاوكات خوێ بە شەقامەكان دەڕشێنن تا شەختە نەكات.