ئاسایشی سلێمانی: ڕووداوی هاتووچۆی سلێمانی-پێنجوێن دەرئەنجامی تاوانێكی قێزەون بووە

ئاڤا نیوز

دەزگای ئاسایشی هەرێمی كوردستان دەستگیرکردنی تۆمەتباری ڕووداوی وەرگەڕانی ئۆتۆمبێلێک لەڕێگای (سلێمانی-پێنجوێن) ڕادەگەیەنێت و ئاشكرای دەكات تۆمەتبار شۆفێری ئۆتۆمبێلەكەی بە چەقۆ برینداركردووە و پاش برینداركردنیشی بەخێراییەكی زۆر بەدوای كەوتووە كە بووەتە هۆی وەڕگەڕانی ئۆتۆمبێلی خێزانێك.

چیرۆكی سەرەكی: شەوی 5-2-2025، ڕووداوێكی وەرگەڕانی ئۆتۆمبێلی خێزانێك لەسەر ڕێگای سلێمانی-پێنجوێن، بووە هۆی گیان لەدەستدانی شۆفێری ئۆتۆمبێلەكە و برینداربوونی یەكێك لە سەرنشینەكانی، ئەوكات دەستبەجێ دەزگای ئاسایشی هەرێمی كوردستان، دەستیكرد بە بەدواداچوون و لێكۆڵینەوە لەسەر هۆكاری ڕووداوەكە.

ڕاگەیێنراوی فەرمی: بەڕێوەبەرایەتیی گشتیی ئاسایشی سلێمانی ڕایگەیاند، لەئەنجامی لێكۆڵینەوەكان، دەرکەوت هۆکاری ڕووداوەکە درووستبوونی شەڕ و دەمەقاڵێ بووە لەنێوان دوو شۆفێر لە ناحیەی ناڵپارێز، یەکێک لەشۆفێرەکان بە چەقۆ هێرش دەکاتە سەر شۆفێری بەرامبەری و برینداری دەکات و دواتر شوێنی دەکەوێت، ئەوەش دەبێتە هۆی وەرگەڕانی و گیان لەدەستدانی شۆفێرەکە و برینداربوونی یەکێک لە سەرنشینانی ئۆتۆمبێلەکە و دواتر تۆمەتباری ڕووداوەکە هەڵهاتووە.

ئەوەی پێویستە بیزانیت: پاش وەرگرتنی بڕیاری دادوەری لێکۆڵینەوەی ئاسایشی سلێمانی، بەدواداچوون و لێکۆڵینەوە لەسەر ڕووداوەکە دەستی پێكردووە و تۆمەتباری ڕووداوەکە دەستنیشانکراوە، تۆمەتبار خۆی ڕادەستی هێزەکانی ئاسایش کرد و ڕووبەڕووی یاسا کرایەوە. ئێستا تۆمەتبارەكە لە بەڕێوەبەرایەتیی ئاسایشی سلێمانی دەستگیر كراوە و لێكۆڵینەوە لە دۆسیەكەی بەردەوامە.