حکومەتی بەریتانیا قاچاخچییەکی کورد دەستگیر دەکات

ئاڤا نیوز

 

حکومەتی بەریتانیا لەسەر داوای وڵاتی فەرەنسا قاچاخچییەکی خەڵکی هەرێمی کوردستان لە لەندەن دەستگیر دەکات، بە تۆمەتی گواستنەوەی خەڵک بە ڕێگەی نایاسایی بۆ وڵاتانی ئەوروپا. 

 

وێنە گەورەکە: وڵاتانی ئەوروپا بەردەوامن گرتنەبەری ڕێککاری جیاواز بەمەبەستی کەمکردنەوە و کۆنترۆڵکردنی هاتنی کۆچبەران بۆ وڵاتەکانیان بە شێوازی نایاسایی، بۆ ئەو مەبەستەش ئەو کەسانە دەستگیر دەکەن کە کاری قاچاخچییەتی دەکەن و خەڵکی بە ڕێگەی ئاوی و وشکانی دەگوازنەوە. 

 

ڕاگەیێنراوی فەرمی: ئاژانسی ڕووبەڕووبوونەوەی تاوانەکان لە بەریتانیا ڕایگەیاند: دوو قاچاخچیی کۆچبەرانیان دەستگیر کردووە کە خەڵکیان لە کەناڵی ئینگلیزەوە بۆ بەریتانیا پەڕاندووەتەوە و کاری سپیکردنەوەی پارەشیان کردووە. 

 

زانیاریی زیاتر: یەکێک لەو قاچاخچییانەی کە دەستگیرکراوە کە ناوی 'ڕێبین شەیفە' و تەمەنی  25 ساڵە و خەڵکی هەرێمی کوردستانە، هاوکات ئەو کەسەی تر کەسێکی بەڕەگەز ئەلبانییە و تەمەن 47 ساڵە، هەردوو تۆمەتبار لە لەندەن دەستگیر کراون. 

 

ئەمەش بزانە: هەردوو تۆمەتبار لەلایەن داواکاری گشتیی فەرەنساوە داواکرابوون، بە تۆمەتی ئەوەی لە ساڵی 2021 تا 2023 خەڵکیان لە نۆکەندی ئینگلیزەوە بەرەو بەریتانیا پەڕاندووەتەوە.

 

باکگراوند: ئەمە یەکەمجار نییە حکومەتی بەریتانیا قاچاخچیی بە ڕەگەز کورد دەستگیر بکات، پێشتریش هەر یەکە لە بەرزان مەجید ناسراو بە "دووپشک" و ئامانج حەسەنزادەی کوردی ڕۆژهەڵاتی کوردستانی دەستگیر کردووە.