ئاڤا بەدواداچوون بۆ مامۆستایانی پێنجوێن دەکات

 

ئاڤا نیوز

بەشێک لەو مامۆستایانەی لەسنووری پێنجوێن دامەزراون، داوای گواستنەوە بۆ پەروەردەکانی خۆیان دەکەن، بەڕێوەبەری گشتیی پەروەردەی قەزاکەش دەڵێت 'میلاکمان کەمە، بە مەرج گواستنەوە دەکەین.

چیرۆکی سەرەکی: ژمارەیەکی زۆری مامۆستا کە خەڵکی دەرەوەی پێنجوێنن، لە پەروەردەی پێنجوێن دامەزراون و ئێستا داوای گواستنەوە بۆ پەروەردەکانی خۆیان دەکەن.

لێدوانە فەرمییەکان:

- ئەسعەد جافر، بەڕێوەبەری پەروەردەی پێنجوێن بە ئاڤای ڕاگەیاند: هیچ مامۆستایەک نییە کە زیاتر لە 10 ساڵ بێت دامەزرابێت، لە ساڵی 2015 تاوەکو 2020 مامۆستا بە گرێبەست دامەزراون، ئەمانەش وەزارەتی پەروەردە گواستنەوەی ڕاگرتوون، ئەو گرێبەستانەی لە 2020 بوون بە میلاک وەزارەتی پەروەردە بەندێکی بۆ داناون، تا 2025-03-01 بەهیچ شێوەیەک گواستنەوە بۆ پەروەردەیەکی دیکە نایگرێتەوە.

گوتیشی: لە مانگی سێی ئەمساڵ لە کاتی دەوام گواستنەوە بۆ ئەو میلاکانە ناکرێت، بەڵکو لە مانگی 7 بەگوێرەی شایستەبوون بگوازرێنەوە، بەڵام بە مەرجێک وەزارەتی پەروەردە مامۆستا لە جێگایان دابنێت، بەو جۆرە نەبێت قوتابخانەکانمان بێ مامۆستا دەبن.

دامەزراندن بەر خەڵکی پێنجوێن نەکەوتووە و زۆرینەی مامۆستا دامەزراوەکان خەڵکی سلێمانی و هەڵەبجە و شارەزوورن، بە ئارەزووی خۆیان لە پێنجوێن فۆرمیان پڕکردووەتەوە، بۆیە حەق نییە دامەزراندنەکەش ببەن و بشگوازرێنەوە بۆ پەروەردەی خۆیان.

- د.سامان سیوەیلی، وتەبێژی وەزارەتی پەروەردە بە ئاڤای گوت: هەر مامۆستایەک بگوازیتەوە دەبێت کەسێک بخرێتە جێگاکەی، ئەمساڵیش نە دامەزراندن و نە گرێبەست نییە، هەر کاتێک دەرگای دامەزراندن کرایەوە، بەگوێرەی ئەوە گواستنەوە دەکرێت، گواستنەوەکەش لە دەسەڵاتی پەروەردەی پارێزگاکانە، ئێمە تەداخول ناکەین.