ئاڤا بەدواداچوون بۆ چۆڵبوونی سێ گوندی ناحیەی دینارتە دەکات

ئاڤا نیوز

ڕێکخراوێکی ئەمریکی ڕایدەگەیێنێت، بەهۆی بۆردوومانی فڕۆکەکانی تورکیا لە ناحیەی دینارتە، دانیشتووانی سێ گوند ناوچەکەیان جێهشتووە، بەڵام بەڕێوەبەری ناحیەی دینارتە دەڵێت، ئەو خێزانانە کۆچەرین و ئەو گوندانە لەدوای ڕاپەڕینەوە ئاوەدان نەکراونەتەوە.

 

وێنە گەورەکە: ماوەی چەند ساڵێکە تورکیا هێرشەکانی چڕ کردووەتەوە و ناوچە جیاوازەکانی هەرێمی کوردستان بۆردوومان دەکات، بەهۆی بوونی گەریلاکانی پارتی کرێکاران لەو ناوچانە، تا ئێستا دەیان گوند چۆڵکراون و چەندین هاونیشتمانیش لەم نێوەندە شەهید بوون.

 

چیرۆکی سەرەکی: ڕێکخراوی CPT بڵاویکردوەتەوە، دوای نیوەڕۆی ئەمڕۆ هەینی بەهۆی بۆردوومانی چڕی فڕۆکە بێفڕۆکەوانەکانی سوپای تورکیا و مەترسی ئۆپەراسیۆنی خاکڕەوی لە ناوچەکەدا، گوندنشینانی هەر سێ گوندی نپاخێ، بێرکەکورێ و کافیا لە بناری چیای گارا، لە ناحیەی دینارتەی سەر بە قەزای ئاکرێ، گوندەکانی خۆیان چۆڵکرد و ڕویان لە ماڵی خزم و کەسوکارەکانییان لە ناحیەی دینارتە و قەزای ئاکرێ کرد.

 

لێدوانی فەرمی: سەربەست سەبری، بەڕێوەبەری ناحیەی دینارتە بە ئاڤا میدیای ڕاگەیاند، ئەو سێ گوندە لەدوای ڕاپەڕینەوە هیچ ماڵێکی لێ ناژین، ئەو خەڵکانەی لەو ناوچانە بوون بۆ کاری مەڕداری بوون، بەبێ ئاگاداری ئێمە ڕۆیشتوون بۆ ئەو ناوچەیە و کاتێک هاتوونەتە خوارەوە بەبێ ئاگاداری ئێمە بووە. دوای شەهید بوونی دوو هاونیشتمانی ئەو ماڵانە ناوچەکەیان جێهێشتووە و هاتوونەتە خوارەوە. ئەوانەی ناچەکەیان چۆڵکردووە ژمارەیان حەوت خێزان بووە.

 

ژمارەکان وادەڵێن: بەگوێرەی ئاماری ڕێکخراوی CPT بەهۆی شەڕی نێوان سوپای تورکیا و گەریلاکانی پەکەکە، تا ئێستا 183 گوند بە تەواوی چۆڵکراون، 602 گوندی دیکە مەترسی چۆڵبوونیان لەسەرە و 400 گوندیش نەتوانراوە ئاوەدان بکرێنەوە.