لە هەرێمی کوردستان ڕێكکاری بەرەنگاربوونەوەی سپیكردنەوەی پارە تاوتوێ دەكرێت

ئاڤا نیوز

 

وەزارەتی دەرەوەی بەریتانیا و سەرۆكایەتیی داواكاری گشتیی هەرێمی كوردستان، ڕێكکارەكانی بەرەنگاربوونەوەی تاوانی سپیكردنەوەی پارە و مایەداركردنی تیرۆر لە هەرێمی كوردستان تاوتوێ دەكەن.

چیرۆکی سەرەکی: شاندێكی وەزارەتی دەرەوەی بەریتانیا بە سەرۆكایەتیی (ئێندرۆ مەهۆنی)، شارەزا لەبواری پارەداركردنی نایاسایی و پارەداركردنی تیرۆر، سەردانی سەرۆكایەتی داواكاری گشتیی هەرێمی كوردستانیان كرد و لەلایەن دادوەری داواكاری گشتیی محەممەد غەفور، پێشوازییان لێ كرا، كە ئێستا لەجیاتی سەرۆكی داواكاری گشتیی كاروبارەكان ڕایی دەكات.

 

ڕاگەیێنراوی فەرمی: یەكەی ڕاگەیاندن و پەیوەندییەكانی سەرۆكایەتیی داواكاری گشتیی هەرێمی كوردستان، بڵاوی كردووەتەوە، لە كۆبوونەوەیەكدا بە ئامادەبوونی دكتۆر محەممەد ڕێكانی و سانا سەباح، دادوەرانی داواكاری گشتیی لە سەرۆكایەتیی داواكاری گشتی، باس لە هەوڵ و ڕێکكارەكانی بەرەنگاربوونەوەی تاوانەكانی سپیكردنەوەی پارە و مایەداركردنی تیرۆر كرا و چۆنیەتی هەماهەنگی و كاری پێكەوەیی لایەنە پەیوەندیدارەكان تاوتوێ كرا، بە لەبەرچاوگرتنی بەرژەوەندیی گشتیی و بە ئەنجام گەیاندنی هەوڵەكان.

 

ئەوەی پێویستە بیزانیت: نەتەوە یەكگرتووەكان لەچوارچێوەی پڕۆگرامی پەرەپێدان زیاتر لە دووساڵە هەماهەنگی لەگەڵ دەزگا پەیوەندیدارەكانی حكومەتی هەرێمی كوردستان دەكات بەمەبەستی بەرەنگاربوونەوەی تاوانەكانی شووشتنەوەی مایە و مایەداركردنی تیرۆر، لەو چوارچێوەیەشدا پڕۆژە یاسای (بەركاركردنی یاسای بەرەنگاربوونەوەی شووشتنەوەی مایە و مایەداركردنی تیرۆر، ژمارە (39)ـی ساڵی 2015ـی فیدڕاڵی لە هەرێمی كوردستان، لە پەرلەمانی كوردستان دوو خوێندنەوەی بۆ كراوە بەرلەوەی خولی پێنجەمی پەرلەمان كۆتایی پێ بێت.