سوودانی: گەندەڵی وەک ڤایرۆس خۆی دەگۆڕێت و دەگونجێنێت

 

ئاڤا نیوز

سەرۆکوەزیرانی عێراق ڕایدەگەیێنێت، گەندەڵی وەک ڤایرۆس وایە و خۆی دەگۆڕێت و خۆی دەگونجێنێت لەبەر ڕۆشنایی ئەو کارانەی کە دەزگا یاساییەکان دەیگرنەبەر و ئاماژە بۆ ئەوەش دەکات گەڕاندنەوەی داواکراو و پارە تاڵانکراوەکانیان وەک مەرجێک لە پەیوەندییە نێودەوڵەتییەکانیان دانراوە.

وێنە گەورەکە: لە دوای ساڵی 2003، گەندەڵی لە عێراق بەربڵاوە و گەیشتووەتە ئاستێكی كۆنتڕۆڵنەكراو و سەرجەم دامەزراوەکانی دەوڵەتی گرتووەتەوە، كۆنتڕۆڵكردن و چارەسەركردنیشی پێویستی بە حكومەتێكی تۆكمە هەیە.

چیرۆکی سەرەکی: ڕۆژی شەممە 8ـی شوباتی 2025، محەممەد شیاع سوودانی، سەرۆکوەزیرانی عێراق سەرپەرشتی کۆنفرانسی چاودێری ناوخۆیی کرد، کە لەلایەن دیوانی چاودێری دارایی فیدراڵییەوە لەژێر دروشمی "چاودێری هێڵی یەکەمی بەرەنگاربوونەوەی گەندەڵی و پتەوکردنی شەفافیەتە" رێکخرا.

ڕاگەیێنراوی فەرمی: بە گوێرەی ڕاگەیێنراوی نووسینگەی سەرۆکوەزیران، لە میانی پێشکەشکردنی گوتارێک لە کۆنفرانسەکەدا سوودانی جەختی لەوە کردەوە کە ئامانج لە کۆنفرانسەکە پەرەپێدانی کاری چاودێری ناوخۆ و چەسپاندنی شەفافییەتە لە ڕاپەڕاندنی ئەرکەکاندا.

بەشێکی تر لە وسەکانی سوودانی:

- چارەسەری یەکلاکەرەوەمان لە کارەکانی حکومەتدا بە شەفافییەت و ڕوونی تەواو و لە چوارچێوەی یاسای بەرەنگاربوونەووی گەندەڵیدا داڕشتووە.

- پشتگیری لە پێشنیازەکانی کۆنفرانسی یەکەمی بەرەنگاربوونەوەی گەندەڵی دەکەین، بەتایبەتی بەهێزکردنی کاری بەشەکانی چاودێری ناوخۆ بە سەرچاوەی مرۆیی و لێهاتووی.

- هەڵسەنگاندنی بەردەوامی ئەدای خاوەنکارە باڵاکان پێویستە بۆ دڵنیابوون لە کاریگەری و ئەدای دامەزراوەکانی حکومەت بەمەبەستی ڕێگریکردن لە گەندەڵی.

- جەخت لەسەر بەدواداچوون بۆ دۆسیەکانی پەیوەست بە ڕای گشتی و گەندەڵی زۆر و بەرپرسە باڵاکانی دەوڵەت دەکەینەوە بۆ سەپاندنی سزای یاسایی بەسەر تۆمەتباراندا.