بوومەلەرزەیەكی بەهێز ئەمریكای لاتینی هەژاند

ئاڤا نیوز

بوومەلەرزەیەكی بەهێز لە دەریای كاریبی لە ناوچەكانی ئەمریكای لاتینی ڕوودەدات و بەهۆیەوە شەپۆڵەكانی دەریا تا سێ مەتر بەرز دەبنەوە و هۆشداری لە ڕوودانی تسۆنامی دەدرێت.

 

چیرۆكی سەركی: بەرەبەیانی ئەمڕۆ 9-2-2025، بوومەلەرزەیەك بە گوڕی 7.6 پلەی ڕێختەر، دەریای كاریبی هەژاند و دەستەی ڕووپێوی جیۆلۆجیی ئەمریكاش، هۆشداری ڕوودانی كارەساتی تسۆنامی دەدات بەتایبەت لە كەناراوەكانی كوبا و هیندۆراس.

 

ڕاگەیێنراوی فەرمی: بەپێی ڕاپۆرتی ناوەندیی هۆشداریی لە شەپۆلەكانی تسۆنامی لە ئۆقیانووسی هێمن، چەقی بوومەلەرزەكە، دەریای كاریبی بووە و بەهۆیەوە شەپۆلەكانی دەریا تا ئاستی مەترێک تا سێ مەتر بەرز دەبنەوە، ئەوەش كاریگەری لەسەر كەناراوە ئاوەدانەكانی وڵاتانی هیندۆراس و دوورگەی كایمان و كوبا دەبێت و كاریگەرییەكەی بگاتە وڵاتانی دیكەی ئەمریكای لاتین.
 
ئەوەی پێویستە بیزانیت: بەهۆی هەڵكەوتە جوگرافییەكەی كە كەوتووەتە سەر هێڵە ترسناكەكانی قڵیشانی زەوی، ناوچەكانی ئەمریكای لاتین لەڕووی ڕووداوی سروشتی و زریان و بوومەلەرزە بە یەكێك لە ترسناكترین ناوچەكانی جیهان دادەنرێت و زۆرترین ڕووداوی سروشتی لێ ڕوودەدات، دیارترینیان بوومەلەرزەكەی ساڵی 2021ـی وڵاتی هایتی بوو كە بەهۆیەوە زیاتر لە دوو هەزار كەس گیانیان لەدەستدا.