لە سەرۆکایەتیی هەرێمی کوردستان پۆستێک بە تورکمان دەدرێت

ئاڤا نیوز

 

لەسەر پێشنیاز و داواکاریی وەزیری هەرێم بۆ کاروباری پێکهاتەکان، پۆستێک لە سەرۆکایەتیی هەرێمی کوردستان بە پێکهاتەی تورکمان دەدرێت. 

 

بۆچی گرنگە: چەندین پێکهاتەی جیاواز لە هەرێمی کوردستان دەژین، مافەکانیان لە ڕووی سیاسی، ڕۆشنبیری و کۆمەڵایەتی بە یاسا پارێزراوە، لەم چوارچێوەیەشدا پۆستێکی دیکە بە پێکهاتەی تورکمان دەدرێت. 

 

لێدوانی فەرمی: ئایدن مەعرووف، وەزیری هەرێم بۆ کاروباری پێکهاتەکان لە حکومەتی هەرێمی کوردستان بە ئاڤا نیوزی ڕاگەیاند: ئارسەن ئاغا وەک ڕاوێژکاری باڵای نێچیرڤان بارزانی، سەرۆکی هەرێمی کوردستان دیاریکرا. 

 

زانیاریی زیاتر: دامەزراندنی ئارسەن ئاغا وەکو ڕاوێژکار لە سەرۆکایەتیی هەرێمی کوردستان لەسەر "پێشنیاز و داواکاریی وەزیری هەرێم بۆ کاروباری پێکهاتەکان بووە، ئەو هەنگاوەشیان پێ باشە".

 

ئەوەی پێویستە بیزانیت: ئارسەن ئاغا برازای سەنعان ئەحمەد ئاغا یەکێک لە دامەزرێنەران و سەرۆکی پێشووی بەرەی تورکمانییە و لە بنەماڵە دیارەکانی شاری هەولێرە.

 

باکگراوند: ئەمە لەکاتێکدایە، دوای بڕیارەکەی دادگەی فیدراڵی لەبارەی کەمکردنەوەی کورسییەکانی پەرلەمان و بەڕێوەچوونی بە شێوازی بازنەیی، ئەرکی تورکمانی بەراورد بە خولی هەڵبژاردنی پێشوو بۆ بەدەستهێنانی کورسیی پەرلەمان قورس کردووە.