شاندی ئیمرالی سەردانی سەرۆک بارزانی دەکات

ئاڤا نیوز

شاندی ئیمرالی لە 16ی شوبات سەردانی هەولێر دەکەن و لەگەڵ سەرۆک مەسعود بارزانی کۆدەبنەوە، هاوکات بەجیا لەگەڵ نێچیرڤان بارزانی، سەرۆکی هەرێمی کوردستان و سەرۆکوەزیران مەسرور بارزانی کۆدەبنەوە. 

 

بۆچی گرنگە: ئامانجی سەردانەکە، شاندەکە ناوەڕۆکی دوو کۆبوونەوەکەی  پێشوویان لەگەڵ ئۆجەلان بۆ سەرۆک بارزانی باس دەکەن، هەروەها دەیانەوێت دیدگا و بۆچوون و  پێشنیارەکانی سەرۆک بارزانی لەسەر ئەو پرسە وەربگرن، دواتریش کە گەڕانەوە ئیمرالی ئەو پێشنیارانە بە ئۆجەلان دەگەیێنن.

 

چیرۆکی سەرەکی: شاندی ئیمرالی کە لە پەرلەمانتاران پەروین بوڵدان و سڕ سورەیا ئۆندار، کێسکین بایندر، هاوسەرۆکی پارتی دیموکراسی ناوچەکان (دەبەپە) لەگەڵ ئەندامانی کۆمسیۆنی پەیوەندییەکانی دەرەوەی دەم پارتی پێک دێن، بڕیاروایە ڕۆژی 16ی شووبات بگەنە هەولێر، بەجیا لەگەڵ هەریەک لە سەرۆک بارزانی و نێچیرڤان بارزانی، سەرۆکی هەرێمی کوردستان، سەرۆکوەزیران  مەسرور بارزانی کۆببنەوە.

 

ڕاگەیێنراوی فەرمی: دەم پارتی ڕایگەیاند، ئەو شاندەی کە دووجار سەردانی ئیمرالی کرد و لەگەڵ عەبدوڵڵا ئۆجەلان کۆبوونەوە، لە چوارچێوەی پرۆسەی چارەسەری کورد لە چاوپێکەوتنەک و سەردانیکردنی لایەنەکان بەردەوام دەبن، بۆ ئەمەش ڕۆژی 16ی شووبات، کۆتایی ئەم هەفتەیە سەردانی هەولێر دەکەن.

 

لەلایەکی دیکەوە: بڕیار وایە شاندەکە لە 17ی شوبات سەردانی سلێمانی بکەن و لەگەڵ بافڵ تاڵەبانی، سەرۆکی یەکێتی نیشتیمانی کوردستان، قوباد تاڵەبانی، جێگری سەرۆکوەزیرانی هەرێمی کوردستان، کۆببنەوە. 

 

قووڵتر: ئەم سەردانەی شاندەکە لە کاتێکدایە، بڕیار وایە ئۆجەلان لە داهاتوویەکی نزیکدا کە ئاماژە بە 15ی شوبات دەکرێت، پەیامێک لەسەر پرسی ئاشتەوایی کورد و "چەکدانانی پەکەکە" بڵاوبکاتەوە.