ئۆتۆمبێلی كارەبایی لەكاتی وەرگرتنی ڕسومات بە سێ پستۆن تۆماردەكرێت

 

ئاڤا نیوز

وەزارەتی ناوخۆی هەرێمی كوردستان بڕیاردەدات، لەكاتی وەرگرتنی ڕسوماتی هاوردەكردن و تۆماركردنی ئۆتۆمبێلی كارەبایی، بە ڕسووماتی سێ پستۆن تۆمار بكرێت.

وێنە گەورەكە: بەڕێوەبەرایەتیی گشتیی هاتووچۆی هەرێمی كوردستان پێشتر دوو نووسراوی فەرمی بۆ وەزارەتی ناوخۆ بەرزكردەوە، بەمەبەستی كارئاسانیكردن بۆ تۆماركردنی ئۆتۆمبێلی كارەبایی بەجۆرێك لە وەرگرتنی ڕسومات، بڕێكی كەمتر هەژمار بكرێت، بەو پێیەی ئەو جۆرە ئۆتۆمبێلانە دۆستی ژینگەن و حكومەتی هەرێمی كوردستان دەیەوێت هانی زیادكردنی هاوردەكردنیان بدات.

ڕاگەیێنراوی فەرمی: وەزارەتی ناوخۆی هەرێمی كوردستان، ڕێنمایی ژمارە 1ـی ساڵی 2025 بڵاودەكاتەوە، كە تایبەتە بە ڕێنمایی مەرجەكانی سەلامەتی و تۆماركردنی ئۆتۆمبێل و ماتۆرسكیلی هاوردەكراو ژمارە 7ـی ساڵی 2021، تێیدا هاتووە، ئۆتۆمبێلی كارەبایی بە ڕسوماتی سێ پستۆن تۆماردەكرێن، ئەگەر ئۆتۆمبێلی قەبارە گەورەش بن، كە خۆیان لە بنەڕەتدا چوار پستۆنن.

ئەوەی پێویستە بیزانیت: ئەو بڕیارە لەڕۆژی بڵاوكردنەوەی لە ڕۆژنامەی فەرمیی وەقایعی كوردستان لەسەرەتای مانگی شوباتەوە جێبەجێ دەكرێت.

هۆكارە زانراوەكان: لەچوارچێوەی بایەخدان بە پاكڕاگرتنی ژینگە و هاندانی كۆمپانیاكانی هاوردەكردنی ئۆتۆمبێل بۆ هاوردەكردنی ئۆتۆمبێلی كارەبایی لە جێگەی ئەو ئۆتۆمبێلانەی كە بە سووتەمەنیی بەنزین و گاز و غاز كاردەكەن، حكومەتی هەرێمی كوردستان مەبەستیەتی باج و ڕسوماتی كەمتر بۆ هاوردەكردن و تۆماركردنی ئۆتۆمبێلە كارەباییەكان وەربگرێت.