پۆلیسی هەولێر: کەسێکمان بە تۆمەتی تێکدانی ئاسایش دەستگیر کردووە

ئاڤا نیوز

پۆلیسی هەولێر ڕایدەگەیەنێت، كەسێكیان بە تاوانی شێواندنی دۆخی ئاسایشی هەرێمی كوردستان دەستگیركردووە و لە كاتێكی نزیكدا وردەكاریی زیاتر بۆ ڕای گشتی دەخاتەڕوو.

چیرۆکی سەرەکی: ڕۆژی یەکشەممە ژمارەیەک مامۆستا و فەرمانبەر لە سلێمانییەوە بە مەبەستی خۆپیشاندان بۆ داواکاری مووچە بەرەو هەولێر بەڕێ کەوتن، بەڵام پارێزگاری هەولێر ڕایگەیاند ئەو مامۆستایانە مۆڵەتی خۆپیشاندانیان نییە تا ئاسایشیان بپارێزین، بۆیە ڕێگە نەدرا لە بازگەی دێگەڵە بڕۆن بۆ هەولێر.

ڕاگەیێنراوی فەرمی: بەڕێوەبەرایەتی پۆلیسی هەولێر لە ڕاگەیێنراوێكدا دەڵێت، دوای ئەوەی چەند لایەنێکی دەرەوەی هەرێمی کوردستان هەوڵی شێواندنی دۆخی ئاسایشی هەرێمی کوردستانیان دا، بەڕێوەبەرایەتیەکەمان بە هەماهەنگی لەگەڵ بەڕێوەبەرایەتی ئاسایشی هەولێر، گەیشتە هەندێک دەرئەنجام و هەندێک لەو کەسانەی وەکو ئامرازی برەوپێدانی ئەو هەڵمەتە ناڕەوایە دەستنیشان کران، یەکێکیان دەستگیر کرا و لە کاتێکی نزیکدا وردەکاریی زیاتر بۆ ڕای گشتی دەخرێتەروو.

بەتەنیشت ئەو بابەتە: بەر لەو ڕاگەیێنراوەی پۆلیسی هەولێر، دوای بڵاوبوونەوەی دەنگۆی دەستگیركردنی خۆپیشاندەران، تیمێكی تایبەتی دەستەی سەربەخۆی مافی مرۆڤ، سەردانی ئاسایشی هەولێریان کرد دەرکەوت هیچ خۆپیشاندەرێک دەستگیر نەکراوە و بانگ نەکراوە بۆ ئاسایشی هەولێر. هیچ سکاڵایەکیش لەسەر ئەو بابەتەو یان بوونی حاڵەتی دەستگیرکردن بەفەرمی نەگەیشتۆتە دەستەکە لەلایەن هیچ کەس و ڕێکخراو و لایەنێک.