بەریتانیا: لە هاوكاریكردنی هێزەكانی پێشمەرگە بەردەوام دەبین

ئاڤا نیوز

ڕاوێژكارانی سەربازیی بەریتانیا لە هەرێمی كوردستان هەوڵ بۆ گۆڕینی پرۆگرامی خوێندنی كۆلێژە سەربازییەكانی هەرێمی كوردستان دەدەن.

وێنە گەورەكە: ئەمڕۆ دووشەممە 2025-02-10، شۆڕش ئیسماعیل، وەزیری کاروباری پێشمەرگە پێشوازی لە کۆڵۆنێڵ جۆن فۆستەر، ڕاوێژکاری باڵای بەرگری لە کونسوڵخانەی شانشینی بەریتانیا لە هەرێمی کوردستان کرد.

لێدوانی فەرمی: کۆڵۆنێڵ فۆستەر، ڕاوێژکاری سەربازی بەریتانیا ڕایگەیاند: هاوکارییەکانی بەریتانیا بۆ حکومەتی هەرێمی کوردستان و وەزارەتی پێشمەرگە بەردەوام دەبێت بە تایبەتی لە بواری مەشق و ڕاهێنان بە هێزی پێشمەرگەی کوردستان.

ڕاگەیێنراوی فەرمی: وەزارەتی پێشمەرگە سەبارەت بە ناوەڕۆكی كۆبوونەوەكە ڕایگەیاند:

- لەو کۆبوونەوەیەدا، وەزیری پێشمەرگە و راوێژکاری باڵای بەریتانیا باسیان لە دۆخی ئەمنی و سیاسی ناوچەکە و عێراق  و هەرێمی کوردستان کرد، بە تایبەتی پرۆسەی چاکسازی لە وەزارەتی پێشمەرگە و بوونیادنانی دوو ناوچەی سەرکردایەتی لە چوارچێوەی وەزارەتی پێشمەرگەدا گفتوگۆیان کرد.

- بە گرنگییەوە باسیان لە هەوڵ و هەنگاوەکانی گۆڕینی پرۆگرامی خوێندنی کۆلێژی ئەرکان و هەردوو کۆلێژی سەربازیی لە هەرێمی کوردستان کرد لەلایەن راوێژکارانی سەربازی بەریتانیا، وەزیری پێشمەرگە ستایشی پشتیوانیی بەردەوامی سوپای شانشینی بەریتانیای کرد بۆ وەزارەتی پێشمەرگە، ئەم گۆرانکارییانەی لە پرۆگرامی خوێندنی کۆلێژە سەربازییەکان بە دەستکەوتێکی گرنگ بۆ سەرخستنی پرۆسەی چاکسازی و نوێبوونەوە و بەرەوپێشچوونی هێزی پێشمەرگەی کوردستان،وەسف کرد.

- کۆڵۆنێڵ فۆستەر،جەختی لە بەردەوامی و هەماهەنگی زیاتری پەیوەندییەکانی نێوان هەردوولا کردەوە.