سەرۆكی هەرێمی كوردستان بۆ نووسەران: پێویستیمان بە خامەكانتانە بۆ بەرگریكردن لە كوردستان

 

ئاڤا نیوز

سەرۆكی هەرێمی كوردستان ڕایدەگەیەنێت، ئێستا هەرێمی كوردستان لەهەموو كاتێك زیاتر پێویستی بە خامەی نووسەرانە كە ڕۆڵى خۆيان له‌ ته‌بايى و پێكه‌وه‌يى و به‌رگريكردن له‌ ماف و ده‌ستكه‌وته‌كانى كوردستاندا بگێڕن.

وێنە گەورەكە: ئەمڕۆ دووشەممە، یادی 55ـەمین ساڵەی دامەزراندنی یەكێتیی نووسەرانی كوردە، كە لە ساڵی 1970 بە هەوڵی ژمارەیەك نووسەری ناوداری ئەوكاتی كورد دامەزرا و مۆڵەتی كاركردنی لە وەزارەتی ناوخۆی عێراق وەرگرت و هاتە مەیدانی كار و خزمەتی ئەدەبی و رۆشنبیری. نێچیرڤان بارزانی، سەرۆكی هەرێمی كوردستان بەم بۆنەیەوە پەیامێكی پیرۆزبایی بڵاوكردەوە.

پەیامی فەرمی: سەرۆكی هەرێمی كوردستان، وێڕای پيرۆزبايی ئەم ساڵیادە له ته‌واوى نووسه‌رانى كورد، ئاماده‌يى و ڕۆڵ و خزمه‌تى نووسەرانی له‌ بره‌ودان به‌ زمان و وێژه‌ى كوردى، به‌رز نرخاند.

- نووسه‌رانى كورد هه‌ميشه‌ دڵسۆزانه‌ له‌پێناو پاراستنى ناسنامه‌ى نه‌ته‌وه‌يى و نيشتمانيى كورد و كوردستان و بوونيادنانى كۆمه‌ڵگه‌يه‌كى هۆشيار و پێشكه‌وتوودا، كار و خزمه‌تيان كردووه‌ و ڕه‌نجێكى زۆريان كێشاوه‌. ڕۆڵێكى به‌رچاويان له‌ قووڵكردنه‌وه‌ى كولتوور و به‌هاكانى پێكه‌وه‌ژيان، يه‌كترقبووڵكردن و لێبورده‌يى له‌نێو كۆمه‌ڵگه‌ى كوردستاندا گێڕاوه‌.

- لە دۆخی ئێستادا هه‌رێمى كوردستان و كۆمه‌ڵگه‌ى كوردستانى له‌ هه‌موو كاتێك زياتر پێويستى به‌ خامه‌ى نووسه‌رانه‌ كه به‌رپرسانه‌ و به‌ بير و پره‌نسيپى جوان، ڕۆڵى خۆيان له‌ ته‌بايى و پێكه‌وه‌يى و به‌رگريكردن له‌ ماف و ده‌ستكه‌وته‌كانى كوردستاندا بگێڕن.