سەرۆکوەزیران مەسرور بارزانی: وەبەرهێنەرانی جیهان بەئامانجی کارکردن ڕوو لەهەرێمی کوردستان دەکەن

ئاڤا نیوز

 

لووتکەی جیهانیی حکومەتەکان لە ئیمارات بەردەوامە مەسرور بارزانی، سەرۆکوەزیرانی هەرێمی کوردستان لە لووتکەکەدا بەشداری لە پانێڵی "تێپەڕاندنی ئاڵنگارییەکان و لەدەستدانی دەرفەتەکان" قسەیکرد و جەختی لەوەکردەوە، هەرێمی کوردستان لەڕووی دیجیتاڵیکردنی سیستەمەکان هەنگاوی باشی بڕیوە و سوود لە ئەزموونی وڵاتە پێشکەوتووەکان وەردەگرن.

 

وێنە گەورەکە: دوو ڕۆژە سەرۆکوەزیران مەسرور بارزانی، بەیاوەری شاندێکی حکومی لە ئیماراتە بەئامانجی ئەنجامدانی چەندین دیدار و کۆبوونەوەی گرنگ و گفتوگۆ لەبارەی پەرەپێدانی پەیوەندییەکانی هەرێمی کوردستان لەگەڵ لایەنە بەشداربووەکانی لووتکەکە.

 

لێدوانی فەرمی: مەسرور بارزانی، سەرۆکوەزیرانی هەرێمی کوردستان لە پانێڵێکی تایبەتدا لە لووتکەی حکومەتەکان لە ئیمارات ڕایگەیاند: لەماوەی 10 ساڵدا گرنگیمان داوە بە هەموو کەرتەکان و ژێرخانێکی باشمان دروست کرد.

* ئێمە لە قۆناغی ڕاگوزەرین و دەستپێکێکی زۆر باشمان هەیە، سەقامگیری کوردستان کاریگەری لەسەر گەشەی ئابووری هەیە.

* هەوڵدەدەین کێشەکانمان لەگەڵ حکومەتی فیدراڵی چارەسەر بکەین، دەمانەوێت لە هەموو بوارە جیاوازەکان گەشە بکەین.

* وەبەرهێنەرانی جیهان بەئامانجی کارکردن ڕوو لەهەرێمی کوردستان دەکەن، هەرێمی کوردستان بووەتە لانەی هیوا بۆ ناوچەکە.

* ئامانجمانە پەرەی زیاتر بە کەرتی گەشتیاریی، بازرگانی و پەروەردە بدەین.

* حکومەت لەڕوانگەی من دابینکار بێت نەک ئاراستەکار،  کار لەسەر ئەوە دەکەین دامەزراوەکانی هەرێمی کوردستان بەباشی بەرەوپێش ببەین.

* ئامانجمانە دەرفەتی یەکسان بۆ سەرجەم چین و توێژەکان بڕەخسێنین.

*لە سەردەمی کۆرۆنا کەرتی تایبەت هاوکاربوو بۆ سەقامگیری ئابووری هەرێمی کوردستان.

*بەردەوام دەبین لە دابینکردنی خزمەتگوزاری دیجیتاڵی بۆ هاووڵاتیان.

*پێشووتر دەبوو خەڵک بە ڕیز بوەستن، ئێستا لەڕێگەی مۆبایلەکانیان مووچە وەردەگرن.

*ئێمە پرۆگرامی چاكسازیی دیجیتاڵی بەهێزمان هەیە و کاری لەسەر دەکەین.

*ناوەندی زانیاریی باشمان دروست كردووە بۆ شیكردنەوە، ئامار و بەراوردكردنی ئەو زانیارییانەی كە بەردەست دەبن.

*هەنگاوە ڕۆتینییەکانمان بۆ ڕاییکردنی کاروبارەکان لەڕێگەی بەدیجیتاڵیکردنی سیستمەکان کەمکردووەتەوە.