ڕووبەڕووبوونەوە لەنێوان سوپای سووریا و چەکدارانی حیزبوڵڵای لوبنان ڕوویدا

ئاڤا نیوز

 

دوای ئۆپەراسیۆنێکی شەش رۆژە، سوپای سووریا چەند ناوچەیەکی سنووری لە پارێزگای حومس کۆنتڕۆڵکرد.

 

چیرۆکی سەرەکی: هەفتەی پێشوو گرووپە چەکدارەکانی نزیک لە حیزبوڵڵای لوبنان بە ژمارەیەکی زۆر لە چەکەوە پەڕینەوە دیوی سنووری نێوان لوبنان سووریا تاگەیشتنە چەند گوندیکی سەر بە پارێزگای حومس و سنووری دێرەزوور بە دیوی لوبنان و دەستیان بەچالاکی سەربازی کردەوە.

 

لێدوانی فەرمی: ئەمڕۆ سێشەممە، 11-2-2025، یوسف خالد، فەرماندەی سەربازی سوپای سووریا بە ڕوانگەی سووری رایگەیاندووە، ئۆپەراسیۆنێکیان لە دژی ئەو چەکدارانە کە لە لوبنانەوە هاتوونەتە نێو خاکی سووریا دەستپێکردووە و دەستیشیان گرتووە بەسەر چەندین چەکدا، هاوکات کۆنتڕۆڵی چەند ناوچەیەکی سنووری لە پارێزگای حومسیش کراوە.

 

زانیاریی زیاتر: هەر لەو ئۆپەراسیۆنەدا دوو چەکداری حیزبوڵڵا بە دیل گیراون و چەندین چەکداری دیکەش کوژراون، هەروەها سوپای سووریا دەستیبەسەر چەند ناوچەیەکی ستراتیژیدا گرتووە و توانراوە کۆنتڕۆڵی ناوچە سنوورییەکانی نێوان لوبنان و سووریا بکات.

 

قووڵتر: بەپێی ڕاگەیێنراوی ڕوانگەی سووری، ئەو چەکدارانەی حیزبوڵڵای لوبنان بەخەڵکی حومسیان گوتووە:" ئێمە هاتووین بۆ پاراستنی ئێوە و موڵک و ماڵتان". کەچی لەسەر دەمی بەشار ئەسەد، ئەو ناوچانە بەدەستی چەکدارانی حیزبوڵڵای لوبنان زۆرترین قوربانیان داوە.

 

باکگراوند: سوپای سووریای نوی کە ئەحمەد شەرع سەرۆکایەتی دەکات و هاوکات سەرۆکۆماری ڕاگوزەرە بۆ قۆناغی ئێستای ئەو وڵاتە، ئۆپەراسیۆنێکی بەرفروانیان لە ناوچە سنوورییەکانی نێوان لوبنان-سووریا، بەمەبەستی بەرەنگاربوونەوەی قاچاخچێتی چەک و ماددەی هۆشبەر و دەستگیرکردنی چەکدارانی حیزبوڵڵای دەستپێکردووە و ئێستاش بەردەوامە.