سەرۆک بارزانی: هەڵوەشاندنەوەی کورسیی کۆتای پێکهاتەکان لێدانە لە پرسی هاوبەشێتی و پێکەوەژیان

ئاڤا نیوز

 

سەرۆک بارزانی لە میانی پێشوازی لە باڵیۆزی ئوسترالیا لە عێراق جەخت دەکەنەوە کە هەڵوەشاندنەوەی کورسیی کۆتای پێکهاتەکان لێدانە لە پرسی هاوبەشێتی و پێکەوەژیان. 

 

وێنە گەورەکە: ڕۆژی دووشەممە 04-03-2024 لە سەڵاحەددین سەرۆک مەسعود بارزانی پێشوازی لە گلین مایڵز باڵیۆزی ئوسترالیا لە عێراق كرد، لە دیدارەکە مایڵز ستایشی پەیوەندییە دووقۆڵییەکانی نێوان وڵاتەکەی و هەرێمی کوردستان کرد و خواستی وڵاتەکەی بۆ قووڵكردنەوەی ئەم پەیوەندییە خستەڕوو.

 

ڕاگەیێنراوی فەرمی: بارەگای بارزانی ناوەڕۆکی کۆبوونەوەی نێوان سەرۆک بارزانی و باڵیۆزی ئوسترالیا لە عێراق بڵاوکردەوە:

• لە دیدارەکەدا تاوتوێی پرسی سەختیی بەڕێوەچوونی پرۆسەی هەڵبژاردن بەبێ بەشداریی سەرجەم پێکهاتەکان کرا، لەبەرئەوەی هەڵوەشاندنەوەی کورسیی کۆتای پێکهاتەکان لێدانە لە پرسی هاوبەشێتی و پێکەوەژیان.

• هەرێمی کوردستان بەردەوام پێداگیریی لەسەر پێکەوەژیان کردووە، بەوپێیەی یەکێکە لەو بنەما سەرەکییانەی کە بەشداریکردن لە پرۆسەی سیاسی لە هەرێمی کوردستاندا لەسەری بوونیاد نراوە.

 

• پێکهاتەکان بەشێکی دانەبڕاون لە گەلی کوردستان و لەبەر توندیی کێبڕکێکان ڕەنگە بەبێ بوونی کۆتا نەتوانن نوێنەرایەتیی خۆیان لە پەرلەمانی کوردستان دەست بخەن.

 

گۆشەیەکی دیکەی دیمەنەکە: مانەوەی هێزەکانی هاوپەیمانییەتی نێودەوڵەتی لە عێراق لە دیدارەکەدا باس کرا، سەرۆک بارزانی گوتی: ئەمە پرسێکی نیشتمانییە و پەیوەستە بە سەرجەم پێکهاتەکان و پێویستە لەم ڕوانگەیەوە درک بە مەترسییەکانی سەرهەڵدانەوەی تیرۆر بکرێت.