هۆشیار زێباری: لەگەڵ یەکێتیی گفتوگۆ لەبارەی دابەشکردنی پۆستەکان دەستپێدەکەین

ئاڤا نیوز

سەرۆکی شاندی دانوستانکاری پارتی بۆ پێکهێنانی کابینەی نوێی حکومەتی هەرێمی کوردستان دەڵێت، هەفتەی داهاتوو لەگەڵ یەکێتی گفتوگۆ لەبارەی دابەشکردنی پۆستەکان دەستپێدەکەن، پێکهێنانی حکومەتیش لە دوو مانگ زیاتر دواناکەوێت.

ئەوەی پێویستە بیزانیت: پارتی و یەکێتی گفتوگۆکانیان لەبارەی کارنامەی کابینەی نوێ تەواوکردووە و وەک خۆیان دەڵێن، لێكگه‌يشتنى هاوبه‌ش و ڕێككه‌وتنى سه‌ره‌تايى له‌سه‌ر زۆربه‌ى ته‌وه‌ره‌كان هاتووه‌ته‌ ئاراوه‌.

لێدوانی فەرمی: هۆشیار زێباری، سەرۆکی شاندی دانوستانکاری پارتی بۆ پێکهێنانی کابینەی نوێی حکومەتی هەرێمی کوردستان بۆ کەناڵی حەدەسی سعودیی ڕایگەیاند:

- بۆ ئامادەکردنی کارنامەی کابینەی نوێی حکومەتی هەرێمی کوردستان گەیشتووینەتە قۆناغێکی باش و پێشکەوتوو.

- لە هەفتەی داهاتووەوە لەگەڵ هاوبەشەکانمان و بەتایبەت هاوبەشی سەرەکیمان یەکێتیی نیشتمانی کوردستان، دەست بە گفتوگۆ دەکەین بۆ دابەشکردنی سەرۆکایەتییەکان و پۆستەکانی دیکە.

- دۆخەکە ئەرێنییە و پێشبینی دەکەین لە دوو مانگی داهاتوودا حکومەتی هەرێمی کوردستان پێکبهێنرێت، لەوە زیاتر پێکهێنانی درێژە ناکێشێت.

- ئارامی باکوور و ڕۆژهەڵاتی سووریا بۆ ئێمە گرنگە، پشتیوانیش لە یەکڕیزی کورد لەو وڵاتە دەکەین بۆ گفتوگۆکانیان لەگەڵ دیمەشق.

- هەوڵدەدەین ڕووبەڕووبوونەوەی سەربازی لە نێوان هەسەدە و تورکیا دووربخەینەوە، داواشمان لە هەسەدە کردووە لە پەکەکە دووربکەوێتەوە.