كونسوڵخانەی چین ژمارەیەك قوتابیی كورد بۆ خوێندن دەنێرێتە چین

ئاڤا نیوز

بەمەبەستی فێربوونی زمانی چینی و بوونیان بە مامۆستای زمانەكە لە هەرێمی كوردستان، كونسوڵخانەی چین لە هەولێر، ژمارەیەك قوتابیی كورد دەنێرێتە چین.

وێنە گەورەكە: ئەمڕۆ چوارشەممە 12-2-2025، لە ڕێوڕەسمێكدا كە تێیدا نوێنەرانی وەزارەتەكانی پەروەردە و خوێندنی باڵا ئامادەی بوون، كونسوڵخانەی چین ناوی پێنج قوتابیی زانكۆی سەڵاحەدینی ئاشكرا كرد كە لەسەر ئەركی كونسوڵخانەكە بۆ مەبەستی فێربوونی زمانی وڵاتەكە دەچنە چین.

لێدوانی فەرمی: لیو جیون، كونسوڵی گشتیی چین لە هەولێر بە كوردستان حەسەن، پەیامنێری دیبلۆماسیی ئاڤا میدیای ڕاگەیاند: 

- تێچووی گەشت و خوێندنی قوتابییەكان لەسەر ئەركی كونسوڵخانەی چینە كە بۆ هەر قوتابییەك دە هەزار دۆلارە، دوای خولەكە ئەو قوتابییە كوردانە دەتوانن ببن بە مامۆستای زمانی چینی لە بەشی زمانی چینی لە زانكۆی سەڵاحەددین و هەر زانكۆیەكی دیكەی هەرێمی كوردستان.

- مەبەستمانە پەیوەندییەكانمان لەگەڵ هەرێمی كوردستان پتەوتر بكەین، پلانمان هەیە ژمارەی زیاتری قوتابیی كوردی زانكۆكانی هەرێمی كوردستان بنێرین بۆ خوێندن لە وڵاتی چین بۆ ئەوەی ببنە پسپۆری زمانی چینی.

ئەوەی پێویستە بیزانیت: بەشی زمانی چینی لە كۆلێژی زمانی زانکۆی سەڵاحەدین- هەولێر، لە ساڵی 2019 کرایەوە و یەکەمین بەشی زمانی چینییە لە هەموو عێراق.